ലണ്ടന്‍: എഫ്. എ കപ്പില്‍ ചെല്‍സിക്കും ലിവര്‍പൂളിനും ജയം. കഴിഞ്ഞ ദിവസം നടന്ന മത്സരത്തില്‍ എതിരില്ലാത്ത രണ്ട് ഗോളിനായിരുന്നു ചെല്‍സിയുടെ ജയം.
നോട്ടംഫോറസ്റ്റിനെയായിരുന്നു ചെല്‍സി പരാജയപ്പെടുത്തിയത്. 6-ാം മിനുട്ടില്‍ ചെല്‍സിക്ക് വേണ്ടി ഹുഡ്‌സണ്‍ ഓഡി, 33-ാം മിനുട്ടില്‍ റോസ് ബാര്‍ക്‌ലി എന്നിവര്‍ ഗോള്‍ സ്വന്തമാക്കി. മറ്റൊരു മത്സരത്തില്‍ എതിരില്ലാത്ത ഒരു ഗോളിന് ലിവര്‍പൂള്‍ എവര്‍ട്ടണെ തകര്‍ത്തു. ലിവര്‍പൂളിന് വേണ്ടി കര്‍ട്ടിസ് ജോണാണ് ഗോള്‍ നേടിയത്.
71-ാം മിനുട്ടിലായിരുന്നു ലിവര്‍പൂളിന്റെ ഗോള്‍ പിറന്നത്. ലിവര്‍പൂള്‍ ഗോള്‍ കീപ്പര്‍ അഡ്രിയാന്റെ മികച്ച സേവുകളാണ് റെഡ്‌സിന് ജയം സമ്മാനിച്ചത്.
മുന്‍നിര താരങ്ങളില്ലാതെ ഇറങ്ങിയ ലിവര്‍പൂള്‍ മികച്ച പ്രകടനമായിരുന്നു പുറത്തെടുത്തത്. പുതുതായി ടീമിലെത്തിയ ജപ്പാന്‍ താരം തക്കുമി മിനാമിന ഇന്നലെ ലിവര്‍പൂളിനായി അരങ്ങേറി. മറ്റൊരു മത്സരത്തില്‍ മിഡില്‍സ്ബര്‍ഗ് ടോട്ടനത്തെ സമനിലയില്‍ തളച്ചു.
50-ാം മിനുട്ടില്‍ ആശ്‌ലി ഫ്‌ലെച്ചറാണ് മിഡില്‍സ്ബര്‍ഗിന് വേണ്ടി ഗോള്‍ നേടിയത്. 61-ാം മിനുട്ടില്‍ ലൂക്കാസ് മോറയുടെ ഗോളിലായിരുന്നു ടോട്ടനം സമനിലയുമായി രക്ഷപ്പെട്ടത്.