കൊച്ചി: മുത്തൂറ്റ് ഫിനാന്‍സ് എം.ഡി ജോര്‍ജ് അലക്‌സാണ്ടറിന് നേരെ കല്ലേറ്. ഇന്ന് രാവിലെ കൊച്ചി ഐ.ജി ഓഫിസിന് മുന്നില്‍ വെച്ചാണ് അലക്‌സാണ്ടറിന്റെ കാറിന് നേരെ കല്ലേറുണ്ടായത്. പരിക്കേറ്റ ഇദ്ദേഹത്തെ കൊച്ചി മെഡിക്കല്‍ ട്രസ്റ്റ് ആശുപത്രിയില്‍ പ്രവേശിപ്പിച്ചു.

മുത്തൂറ്റ് ഫിനാന്‍സില്‍ നിന്നും പിരിച്ചുവിട്ട തൊഴിലാളികളെ തിരിച്ചെടുക്കണമെന്നവാശ്യപ്പെട്ട് സമരം തുടരുകയാണ്. കഴിഞ്ഞ ദിവസം ഓഫിസിന് മുന്നില്‍ തടിച്ചു കൂടിയ സമരക്കാര്‍ ജീവനക്കാരെ അകത്തേക്ക് കയറ്റിവിട്ടിരുന്നില്ല. ഇന്ന് ജീവനക്കാരോട് ഐ.ജി ഓഫിസ് സമീപത്ത് എത്താനും അവിടുന്ന് ഒരുമിച്ച് ഓഫിസില്‍ കയറാമെന്നുമാണ് എം.ഡി അറിയിച്ചിരുന്നത്. ഇത്പ്രകാരം ഐ.ജി ഓഫീസിന് മുന്നില്‍ എത്തിയതായിരുന്നു ജോര്‍ജ് അലക്‌സണ്ടര്‍.

തലക്ക് പരിക്കേറ്റ ഇദ്ദേഹത്തെ ആശുപത്രിയില്‍ പ്രവേശിപ്പിക്കുകയായിരുന്നു. പിന്നീട് പൊലിസ് എത്തിയാണ് ജീവനക്കാരെ ഓഫിസിലെത്തിച്ചത്.

സമരക്കാരാണ് ജോര്‍ജ് അലക്‌സണ്ടറെ ആക്രമിച്ചതെന്നാണ് ആരോപണം. എന്നാല്‍ ഇത് സമരക്കാര്‍ നിഷേധിച്ചു.