മുക്കം: സര്‍വിസ് നടത്തിയ ലോറി ഡ്രൈവറെ ഹര്‍ത്താല്‍ അനുകൂലികള്‍ പിന്തുടര്‍ന്ന് ക്രൂരമായി മര്‍ദിച്ചു. മുക്കം നഗരസഭയിലെ പൂളപൊയില്‍ സ്വദേശി മൂശാരിക്കണ്ടി അന്‍സാര്‍ അലിക്കാണ് മര്‍ദനമേറ്റത്. ഇയാളെ സ്വകാര്യ ആശുപത്രിയില്‍ പ്രവേശിപ്പിച്ചു.
മുക്കം പി.സി ജങ്ഷനില്‍ ഹര്‍ത്താല്‍ അനുകൂലികള്‍ വാഹനം തടയുന്നതിനിടെ അതുവഴി വന്ന അന്‍സാറിന്റെ ലോറിക്ക് കൈ കാണിച്ചെങ്കിലും നിര്‍ത്താതെ പോവുകയായിരുന്നു. ഇതില്‍ പ്രകോപിതരായി ബൈക്കില്‍ പിന്തുടര്‍ന്ന് തടഞ്ഞുനിര്‍ത്തിയാണു മര്‍ദിച്ചതെന്ന് അന്‍സാര്‍ അലി പറഞ്ഞു.
ഇയാളുടെ ലോറിക്ക് കല്ലെറിയുകയും ചെയ്തിട്ടുണ്ട്. കല്ലേറില്‍ ലോറിയുടെ ചില്ല് പൊട്ടി. സംഭവവുമായി ബന്ധപ്പെട്ട് കാരശ്ശേരി പഞ്ചായത്തിലെ ആനയാംകുന്ന് സ്വദേശി റെനീഷി (33)നെ മുക്കം പൊലിസ് അറസ്റ്റ് ചെയ്തു.