തൃശൂര്‍: ജിഷ്ണുവിന്റെ മരണവുമായി ബന്ധപ്പെട്ട കേസില്‍ പാമ്പാടി നെഹ്‌റു കോളജ് പി.ആര്‍.ഒ കെ.വി. സഞ്ജിത്തിന്റെ ജാമ്യാപേക്ഷ പരിഗണിക്കുന്നത് ബുധനാഴ്ചത്തേക്ക് മാറ്റി. തൃശൂര്‍ പ്രിന്‍സിപ്പല്‍ സെഷന്‍സ് കോടതിയുടേതാണ് വിധി. പ്രതിക്ക് ജാമ്യം അനുവദിക്കരുതെന്ന് പ്രത്യേക അന്വേഷണസംഘം കോടതിയില്‍ ആവശ്യപ്പെട്ടിരുന്നു. മുന്‍മന്ത്രി കെ.പി. വിശ്വനാഥന്റെ മകനായ സഞ്ജിത്ത് കേസില്‍ രണ്ടാം പ്രതിയാണ്.
കേസിലെ ഒന്നാം പ്രതിയും കോളജ് ചെയര്‍മാനുമായ പി. കൃഷ്ണദാസിന് അനുവദിച്ച ഇടക്കാല ജാമ്യം റദ്ദാക്കണമെന്ന് ആവശ്യപ്പെട്ട് സര്‍ക്കാര്‍ സമര്‍പ്പിച്ച ഹരജി ഹൈകോടതി ചൊവ്വാഴ്ച പരിഗണിക്കും. കഴിഞ്ഞ വ്യാഴാഴ്ചയാണ് ഹൈകോടതി കൃഷ്ണദാസിന്റെ അറസ്റ്റ് തടഞ്ഞ് അഞ്ചു ദിവസത്തേക്ക് ഇടക്കാലജാമ്യം അനുവദിച്ചത്. ജാമ്യം ലഭിക്കുന്നതിനായി കൃഷ്ണദാസ് കോടതിയെ തെറ്റിദ്ധരിപ്പിച്ചതായി പിന്നീട് കണ്ടെത്തിയിരുന്നു.

കോളജ് വൈസ് പ്രിന്‍സിപ്പലിന്റെയും പി.ആര്‍.ഒയുടെയും മുറിയില്‍നിന്ന് രക്തക്കറ കണ്ടെത്തിയത് അന്വേഷണസംഘം കോടതിയെ അറിയിച്ചതായാണ് സൂചന. സി.സി ടി.വി ദൃശ്യങ്ങള്‍ നശിപ്പിച്ചതും അത് കണ്ടെത്താനുള്ള നടപടികളിലേക്ക് കടന്നിട്ടുള്ളതും കോടതിയുടെ ശ്രദ്ധയില്‍ പെടുത്തിയതായും റിപ്പോര്‍ട്ടുണ്ട.