ചെറുവത്തൂര്‍: കൈയില്‍ ചേര്‍ത്തു പിടിച്ച വര്‍ണ്ണനൂലുകളില്‍ വിസ്മയം നെയ്ത് രാമഞ്ചിറയില്‍ ചരടുകുത്തി കോല്‍ക്കളി. സി.പി.എം രാമഞ്ചിറ ബ്രാഞ്ചിന്റെ നേതൃത്വത്തിലാണ് ചരട് കുത്തി കോല്‍ക്കളി അരങ്ങിലെത്തിച്ചത്. കളിക്കളത്തിനു നടുവില്‍ കുഴിച്ചിട്ട തൂണില്‍നിന്നുള്ള വര്‍ണച്ചരടുകള്‍ കൈകളില്‍ ചേര്‍ത്തു പിടിച്ചാണ് കോല്‍ക്കളിക്കായി സ്ത്രീകള്‍ അരങ്ങിലെത്തിയത്.
ചുവടുകള്‍ക്കൊപ്പം വര്‍ണച്ചരടുകളാല്‍ വല നെയ്തുണ്ടാകുന്ന ആകര്‍ഷണീയമായ കളിയാണ് ചരടുകുത്തി കോല്‍ക്കളി.
കൈകളില്‍ പിടിച്ചിരിക്കുന്ന നൂലുകള്‍ വലിഞ്ഞു നില്‍ക്കാതെ അയഞ്ഞുപോകുകയോ കളിക്കാരിലാരെങ്കിലും ചുവടുകള്‍ തെറ്റിക്കുകയോ ചുവടുവെപ്പിന്റെ വേഗത്തില്‍ വ്യത്യാസം വരികയോ ചെയ്താല്‍ മറ്റുകളിക്കാരുടെ കഴുത്തില്‍ ചരടുചുറ്റി അപകടമുണ്ടകുമെന്നതിനാല്‍ നല്ല പരിശീലനം ചരടുകുത്തിക്കളിക്ക് അത്യന്താപേക്ഷിതമാണ്.
പ്രദേശത്തെ 22 വനിതകളാണ് ആറു മാസത്തെ പരിശീലനത്തിനു ശേഷം വേദിയിലെത്തിയത്.