ന്യൂഡല്‍ഹി: നിര്‍ഭയക്കേസില്‍ പ്രതി വിനയ്കുമാര്‍ ശര്‍മ സുപ്രിംകോടതിയില്‍ തിരുത്തല്‍ഹരജി നല്‍കി. മറ്റ് പ്രതികളായ മുകേഷ് സിങ്, അക്ഷയ് താക്കൂര്‍, പവന്‍ ഗുപ്ത എന്നിവരും ഉടന്‍ തിരുത്തല്‍ ഹരജി സമര്‍പ്പിക്കും. രാഷ്ട്രപതിക്ക് മുന്‍പാകെ പ്രതികള്‍ ദയാഹരജിയും നല്‍കും.

നാലുപ്രതികളുടെയും വധശിക്ഷ നടപ്പാക്കാന്‍ കീഴക്കോടതി മരണവാറന്റ് പുറപ്പെടുവിച്ചതിന് പിന്നാലെയാണ് വിനയ് കുമാര്‍ ഹരജി സമര്‍പ്പിച്ചത്. ജനുവരി 22ന് രാവിലെ ഏഴുമണിക്ക് തിഹാര്‍ ജയിലില്‍ തൂക്കിലേറ്റാനാണ് മരണ വാറന്റിലെ നിര്‍ദേശം.

2012 ഡിസംബര്‍ 16ന് അര്‍ധരാത്രിയായിരുന്നു ഡല്‍ഹിയില്‍ ഓടുന്ന ബസില്‍ പെണ്‍കുട്ടി കൂട്ടബലാത്സംഗത്തിനിരയായിരുന്നത്. ക്രൂരമായി ആക്രമിക്കപ്പെട്ട ഇവര്‍ ആ വര്‍ഷം ഡിസംബര്‍ 29നു മരണത്തിനു കീഴടങ്ങുകയായിരുന്നു. കേസില്‍ പിടിയിലായ അഞ്ചുപേരില്‍ ഒരാള്‍ ജയിലില്‍വച്ച് ആത്മഹത്യ ചെയ്തിരുന്നു.