കൊടുവള്ളി: ഗവ. ഹയര്‍ സെക്കന്‍ഡറി സ്‌കൂള്‍ അഞ്ചാം ക്ലാസ് വിദ്യാര്‍ഥിയും പാലക്കുറ്റി മുക്കുന്നുമ്മല്‍ മമ്മുക്കുട്ടി ഗുരുക്കളുടെ മകനുമായ റസല്‍ റഹ്മാന്റെ(11) വിയോഗത്തില്‍ നാട് തേങ്ങി. കഴിഞ്ഞ ദിവസം ദേശീയപാതയില്‍ കൊടുവള്ളി മുസ്‌ലിം യതീംഖാനക്കു സമീപമുണ്ടായ അപകടത്തിലാണു വിദ്യാര്‍ഥിയുടെ ജീവന്‍ പൊലിഞ്ഞത്.
സ്‌കൂള്‍ കഴിഞ്ഞ് അയല്‍വാസിക്കൊപ്പം സ്‌കൂട്ടറില്‍ വീട്ടിലേക്കു മടങ്ങുന്ന വഴിക്ക് കെ.എസ്.ആര്‍.ടി.സി ബസിനടിയില്‍ പെടുകയായിരുന്നു. പോസ്റ്റുമോര്‍ട്ടത്തിനു ശേഷം ഇന്നലെ ഉച്ചയ്ക്ക് ഒന്നിനു വീട്ടിലെത്തിച്ച മൃതദേഹം കാണാന്‍ നാടിന്റെ നാനാഭാഗങ്ങളില്‍ നിന്ന് ആളുകള്‍ ഒഴുകിയെത്തി. എം.എല്‍.എമാരായ കാരാട്ട് റസാഖ്, പി.ടി.എ റഹീം, മുന്‍ എം.എല്‍.എ വി.എം ഉമ്മര്‍ മാസ്റ്റര്‍ എന്നിവര്‍ വസതി സന്ദര്‍ശിച്ചു.
മകന്റെ വിയോഗ വാര്‍ത്തയറിഞ്ഞ് കുവൈത്തില്‍ ജോലി ചെയ്യുന്ന പിതാവ് മമ്മുക്കുട്ടി ഉച്ചയോടെ വീട്ടിലെത്തി. തുടര്‍ന്ന് ഒന്നേ മുക്കാലിന് പാലക്കുറ്റി ആക്കിപ്പോയില്‍ ജുമാമസ്ജിദില്‍ വന്‍ ജനാവലിയുടെ സാന്നിധ്യത്തില്‍ മയ്യിത്ത് നിസ്‌കാരം നടന്നു. തുടര്‍ന്നു പള്ളിയില്‍ പൊതുദര്‍ശനത്തിനു വച്ച് 2.15ഓടെയാണ് ഖബറടക്കിയത്.