റെയില്‍വേ ട്രാക്കില്‍ വീണ കുട്ടിയെ എടുക്കാന്‍ അയാള്‍ രണ്ടാമതൊന്ന് ആലോചിക്കാതെ ചാടി. ഏതു സമയത്തും ട്രെയിന്‍ വരാമെന്നറിഞ്ഞിട്ടും കുട്ടിയുടെ നിസഹായാവസ്ഥ കണ്ടാണ് അയാള്‍ ചാടിയത്. അതിസാഹസികമായ ഈ രക്ഷിക്കലിന്റെ സി.സി.ടി.വി ദൃശ്യം റെയില്‍വേ അധികൃതര്‍ പുറത്തുവിട്ടിരിക്കുകയാണ്.

റഷ്യയിലെ യേകടേറിന്‍ബര്‍ഗ് റെയില്‍വേയിലാണ് സംഭവം. കുട്ടി ട്രാക്കിലേക്ക് തെന്നി വീഴുകയും നിരവധി പേര്‍ നിന്നു നോക്കുകയും ചെയ്യുന്നുണ്ട്. ഇതിനിടെ ഒരാള്‍ ധൈര്യപൂര്‍വ്വം ട്രാക്കിലേക്ക് ചാടി കുട്ടിയെ രക്ഷിക്കുകയായിരുന്നു. കുട്ടിയെ പ്ലാറ്റ്‌ഫോമില്‍ കയറ്റിയ ഉടനെ ട്രെയിന്‍ വരുന്നതും ദൃശ്യത്തിലുണ്ട്.

അതേസമയം, കുട്ടിയെ രക്ഷിക്കാന്‍ ഓടിയടുത്തയാളെ ആരും തിരിച്ചറിഞ്ഞിട്ടില്ല. പിന്നീട് കുട്ടിയുടെ പിതാവ് അന്വേഷിച്ചെങ്കിലും കണ്ടെത്താനായില്ല. എങ്ങനെയാണ് കുട്ടി വീണതെന്ന് അറിയില്ലെന്നും ഫോണില്‍ കളിച്ചതു കൊണ്ട് വീണതായിരിക്കാമെന്നും പിതാവ് പറയുന്നു. രക്ഷിച്ചയാളെ കണ്ടെത്തി നന്ദി അറിയിക്കണമെന്നും അദ്ദേഹം പറഞ്ഞു.