താമരശ്ശേരി: മേഖലയില്‍ വിദേശ മദ്യം കരിഞ്ചന്തയില്‍ വില്‍പ്പന നടത്തുന്നയാളെ എക്‌സൈസ് സംഘം പിടികൂടി. പുതുപ്പാടി കാവുംപുറം പുല്ലുമലയില്‍ രാജീവനെയാണ് താമരശ്ശേരി എക്‌സൈസ് ഇന്‍സ്‌പെക്ടറുടെ നേതൃത്വത്തിലുള്ള സംഘം പിടികൂടിയത്.
10 ലിറ്റര്‍ വിദേശമദ്യവും മദ്യം കടത്താനുപയോഗിച്ച സ്‌കൂട്ടറും കസ്റ്റഡിയിലെടുത്തു. താമരശ്ശേരി എക്‌സൈസ് ഇന്‍സ്‌പെക്ടര്‍ പി.എ സഹദുല്ലയുടെ നേതൃത്വത്തില്‍ നടന്ന വാഹന പരിശോധനയിലാണു വിദേശമദ്യവുമായി രാജീവന്‍ പിടിയിലായത്. കുന്ദമംഗലം, തിരുവമ്പാടി, വൈത്തിരി എന്നിവിടങ്ങളിലെ വിദേശ മദ്യഷാപ്പുകളില്‍ നിന്നു വാങ്ങുന്ന വിദേശമദ്യം സ്‌കൂട്ടറില്‍ ആവശ്യക്കാര്‍ക്കെത്തിക്കുകയാണു പതിവ്.
തിരുവമ്പാടി, കുന്ദമംഗലം പൊലിസ് സ്റ്റേഷനുകളില്‍ ഇയാള്‍ക്കെതിരേ അബ്കാരി കേസ് നിലവിലുണ്ട്. പ്രിവന്റിവ് ഓഫിസര്‍ കെ. ഗിരീഷ്, സിവില്‍ എക്‌സൈസ് ഓഫിസര്‍മാരായ പി.സി ബാബു, ടി. നൗഫല്‍, എന്‍.പി വിവേക്, പി. പ്രിയരഞ്ജിന്‍ ദാസ്, കൃഷ്ണന്‍ എന്നിവരും എക്‌സൈസ് സംഘത്തിലുണ്ടായിരുന്നു. താമരശ്ശേരി കോടതിയില്‍ ഹാജറാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു.