തൊടുപുഴ: എല്‍.ഡി.എഫിനെ ദുര്‍ബലപ്പെടുത്തുന്ന നിലപാട് സ്വീകരിക്കാതിരുന്നാല്‍ മുന്നണിയിലെ എല്ലാവര്‍ക്കും നല്ലതായിരിക്കുമെന്ന് വൈദ്യുതി മന്ത്രി എം.എം മണിയുടെ മുന്നറിയിപ്പ്.
യു.ഡി.എഫിനൊപ്പം ആരെങ്കിലും സമരം ചെയ്യാന്‍ പോയാല്‍ സ്വയം കുഴിതോണ്ടലായിരിക്കുമെന്നും അദ്ദേഹം പറഞ്ഞു. തൊടുപുഴയില്‍ എന്‍.ജി.ഒ യൂനിയന്‍ ജില്ലാ സമ്മേളനത്തിന്റെ സമാപന പൊതുയോഗം ഉദ്ഘാടനം ചെയ്യവെയാണ് സി.പി.ഐ ദേശീയ എക്‌സിക്യൂട്ടീവ് അംഗം പന്ന്യന്‍ രവീന്ദ്രന്റെ പേരുപറയാതെ എം.എം മണി മുന്നറിയിപ്പ് നല്‍കിയത്.
നടി ആക്രമിക്കപ്പെട്ടത് ഒറ്റപ്പെട്ട സംഭവമല്ലെന്നും കേരളത്തില്‍ അധോലോക സംഘങ്ങള്‍ വിലസുകയാണെന്നും പന്ന്യന്‍ ഞായറാഴ്ച തൊടുപുഴയില്‍ പറഞ്ഞിരുന്നു.
ഇടതുമുന്നണിയില്‍ ആകെ കുഴപ്പമാണെന്നാണ് ചിലരുടെ പ്രചാരണം. ചില തര്‍ക്കങ്ങള്‍ ഉണ്ടെന്നത് ശരിയാണ്. വ്യത്യസ്ത നിലപാടുകളുള്ള വിവിധ പാര്‍ട്ടികളുടെ വേദിയാണ് ഇടതുമുന്നണി. തര്‍ക്കങ്ങളുണ്ടെങ്കില്‍ പറഞ്ഞുതീര്‍ക്കാനും തങ്ങള്‍ക്കറിയാം. മുന്നണി തകരുമെന്ന് ആരും സ്വപ്നം കാണേണ്ട.
സെക്രട്ടേറിയറ്റിലെ ഒരു വിഭാഗം ജീവനക്കാര്‍ ഇപ്പോള്‍ സമരത്തിലാണ്. അവര്‍ തനിയെ നിര്‍ത്തിപ്പോകേണ്ടി വരും. ഭീഷണിയൊന്നും ഈ ഗവണ്‍മെന്റിന് മുന്നില്‍ വിലപ്പോകില്ലെന്ന് അവര്‍ മനസിലാക്കണം. എം.എം മണി കൂട്ടിച്ചേര്‍ത്തു.