ദുബായ്: തുര്‍ക്കിയിലെ ഇസ്താംബൂളിലെ സഊദി കോണ്‍സുലേറ്റില്‍ വെച്ചു കൊല്ലപ്പെട്ട സഊദി മാധ്യമ പ്രവര്‍ത്തകന്‍ ജമാല്‍ ഖശോഗിയുടെ കൊലപാതക പ്രതികളുടെ വിചാരണ അനിശ്ചിതത്വത്തില്‍ ആകുമെന്ന് റിപ്പോര്‍ട്ടുകള്‍. ഇരുരാജ്യങ്ങളും അങ്ങോട്ടുമിങ്ങോട്ടും ആവശ്യങ്ങള്‍ ഉന്നയിച്ചു വാഗ്വാദങ്ങള്‍ തുടരുന്നതാണ് വിചാരണ നീളുമെന്ന അവസ്ഥയിലേക്ക് കാര്യങ്ങള്‍ നീങ്ങുന്നത്. വിചാരണയുടെ ആദ്യ സിറ്റിംഗ് നടന്ന വിവരങ്ങള്‍ പുറത്തു വിട്ടപ്പോള്‍ സഊദി അറ്റോര്‍ണി ജനറല്‍ നടത്തിയ പ്രസ്താവനയും ഇതാണ് സൂചിപ്പിക്കുന്നത്.

കൊലപാതകം നടന്നത് തുര്‍ക്കിയിലായതിനാല്‍ പ്രതികളെ തങ്ങള്‍ക്ക് വിട്ടു നല്‍കണമെന്നതാണ് തുര്‍ക്കിയുടെ ആവശ്യം. എന്നാല്‍ ഇക്കാര്യം നിരസിക്കുന്ന സഊദി കേസ് നടത്തുന്നതിനും പരമാവധി ശിക്ഷ നല്‍കുന്നതിനും തെളിവുകള്‍ പൂര്‍ണമായും നല്‍കണമെന്നാണ് തുര്‍ക്കിയോട് ആവശ്യപ്പെടുന്നത്. സ്വന്തം പൗരന്മാരെ വിട്ടു നല്‍കാന്‍ ഭരണഘടന അനുവദിക്കുന്നില്ലെന്നാണ് സഊദിയുടെ പക്ഷം. കേസിന്റെ വിചാരണ തുടങ്ങിയതോടെ തെളിവുകള്‍ അനിവാര്യമാകും.

കേസ് പുരോഗതി അറിയിച്ചും കേസിന് സഹായകമായ തെളിവുകള്‍ കൈമാറാന്‍ ആവശ്യപ്പെട്ടും ഡിസംബര്‍ 17ന് തുര്‍ക്കി പബ്ലിക് പ്രോസിക്യൂഷന് സഊദി പബ്ലിക് പ്രോസിക്യൂഷന്‍ രണ്ടു കത്തുകള്‍ അയച്ചിരുന്നു. കൂടാതെ ഇതിനു മുമ്പ് ഒക്‌ടോബര്‍ 17നും ഒക്‌ടോബര്‍ 25നും ഒക്‌ടോബര്‍ 31നും തുര്‍ക്കി പബ്ലിക് പ്രോസിക്യൂഷന് കത്തുകള്‍ അയച്ചിരുന്നു. ഇതില്‍ തുര്‍ക്കി അധികൃതരുടെ ഭാഗത്തു നിന്ന് ഇതുവരെ ലഭ്യമായിട്ടില്ലെന്നും മറുപടി ലഭിക്കുന്നത് കാത്തിരിക്കുകയാണെന്നും സഊദി അറ്റോര്‍ണി ജനറല്‍ പറഞ്ഞു.

കേസില്‍ രഹസ്യാന്വേഷണ സഊദി വിഭാഗം ഉന്നതരടക്കം 18 പേരാണുള്ളത്. ഇതില്‍ പ്രതികളായി കുറ്റപത്രം സമര്‍പ്പിച്ച 11 പേരും സഊദി പൗരന്മാരാണ്. ആദ്യ അഞ്ചുപേര്‍ക്ക് വധശിക്ഷ നല്‍കണമെന്നും പ്രോസിക്യൂഷന്‍ ആവശ്യപ്പെട്ടിട്ടുണ്ട്. കേസന്വേഷണത്തിനായി പ്രത്യേകം രൂപം നല്‍കിയ സഊദി, തുര്‍ക്കി സംയുക്ത സംഘത്തില്‍നിന്ന് ആദ്യ ഘട്ടത്തില്‍ ലഭിച്ച വിവരങ്ങളുടെയും സഊദി പബ്ലിക് പ്രോസിക്യൂഷന്‍ നടത്തുന്ന അന്വേഷണങ്ങളുടെയും അടിസ്ഥാനത്തിലാണ് പതിനൊന്നു പേര്‍ക്കെതിരെ കുറ്റം ചുമത്തിയത്.