തിരുവനന്തപുരം: ബീമാപ്പള്ളി ദര്‍ഗാ ഷെരീഫ് ഉറൂസ് മുബാറക് 28 മുതല്‍ മാര്‍ച്ച് 10 വരെ നടക്കുമെന്നു ബീമാപള്ളി മുസ്‌ലിം ജമാഅത്ത് ജനറല്‍ സെക്രട്ടറി എം.ജി.എം നജ്മുദീന്‍ വാര്‍ത്താസമ്മേളനത്തില്‍ അറിയിച്ചു. 28നു രാവിലെ എട്ടിന് ദു:ആയോടെ ദര്‍ഗാ ഷെരീഫ് അങ്കണത്തില്‍ നിന്നും പട്ടണപ്രദക്ഷിണം ആരംഭിച്ച് 10.30നു തിരികെ എത്തിച്ചേരും. തുടര്‍ന്നു ബീമാപള്ളി ജുമാമസ്ജിദ് ചീഫ് ഇമാം അല്‍ഹാജ് ഹസന്‍ അഷ്‌റഫി ഫാളില്‍ അല്‍ ബാഖവിയുടെ ദു:ആയ്ക്കു ശേഷം 11നു ബീമാപള്ളി മുസ്‌ലിം ജമാഅത്ത് പ്രസിഡന്റ് പി.എം യൂസഫ് ഹാജി പതാകയുയര്‍ത്തും.
28 മുതല്‍ മാര്‍ച്ച് ഒന്‍പതുവരെ രാത്രി ഒന്‍പതിനു പ്രഗത്ഭ പണ്ഡിതന്മാരുടെ മതപ്രഭാഷണം ഉണ്ടായിരിക്കും. സിബ്അത്തുള്ള ഫൈസി മണ്ണാര്‍ക്കാട്, ഹാഫിള് മസ്ഹൂദ് സഖാഫി ഗൂഡല്ലൂര്‍, ഇ.പി അബൂബക്കര്‍ അല്‍ഖാസിമി (പത്തനാപുരം), ഷമീര്‍ ദാരിമി (കൊല്ലം), നവാസ് മന്നാനി പനവൂര്‍(ചീഫ് ഇമാം, മണക്കാട് ജുമാ മസ്ജിദ്), അബൂറബീഹ് സദക്കത്തുള്ള മൗലവി എം.എഫ്.ബി (ചീഫ് ഇമാം, കടുവായില്‍), നൗഷാദ് ബാഖവി ചിറയിന്‍കീഴ്, ഹസന്‍ അഷ്‌റഫി ഫാളില്‍ ബാഖവി (ബീമാപള്ളി ജുമാ മസ്ജിദ് ചീഫ് ഇമാം), ഹാമിദ് യാസീന്‍ ജൗഹരി അല്‍ മദനി, മുള്ളൂര്‍കര മുഹമ്മദലി സഖാഫി തുടങ്ങി പ്രമുഖര്‍ വ്യത്യസ്ഥ ദിവസങ്ങളിലായി പ്രഭാഷണം നടത്തും.
സമാപന ദിവസമായ മാര്‍ച്ച് 10നു പുലര്‍ച്ചെ 1.30നു പട്ടണപ്രദക്ഷിണവും തുടര്‍ന്നു രാവിലെ നാലിനു സയ്യിദ് നജ്മുദീന്‍ പൂക്കോയ തങ്ങള്‍ അല്‍ ഹൈദ്രൂസിയുടെ നേതൃത്വത്തില്‍ പ്രത്യേക പ്രാര്‍ഥന നടക്കും. അന്നദാനത്തിനുശേഷം രാവിലെ ആറിനു സമാപനം. ഉറൂസ് പ്രമാണിച്ചു തിരുവനന്തപുരം ജില്ലയിലെ വിവിധ ഭാഗങ്ങളിലെ കെ.എസ്.ആര്‍.ടി.സി ഡിപ്പോകളില്‍ നിന്നും പ്രത്യേക ബസ് സര്‍വിസ് ഉണ്ടായിരിക്കും.
വാര്‍ത്താസമ്മേളനത്തില്‍ ബീമാപള്ളി മുസ്‌ലിം ജമാഅത്ത് പ്രസിഡന്റ് പി.എം യൂസഫ് ഹാജി, ബീമാപള്ളി റഷീദ്, ടി.റഷീദ്, എച്ച്. നസീര്‍, ട്രഷറര്‍ എച്ച്. മൈതീന്‍, എച്ച്. സക്കീര്‍, മുഹമമ്മദ് ബഷീര്‍ എന്നിവരും പങ്കെടുത്തു.