തൃശൂര്‍: കഞ്ചാവ് വില്‍പന അന്വേഷിക്കാനെത്തിയ എക്‌സൈസ് സംഘത്തിനുനേരെ തോക്ക് ചൂണ്ടിയും കഠാരവീശിയും നായയെ അഴിച്ചുവിട്ടും ഗുണ്ടാതലവന്റെ ആക്രമണം.
നടത്തറ കാച്ചേരി വാഴപ്പിള്ളി വീട്ടില്‍ നോബി (20) ആണ് ആക്രമണം നടത്തിയത്. എക്‌സൈസ് ഉദ്യോഗസ്ഥര്‍ സാഹസികമായി ഇയാളെ അറസ്റ്റ് ചെയ്തു.
നടത്തറ കുട്ടനെല്ലൂര്‍ ഭാഗത്ത് കഞ്ചാവ് സംഘത്തിന്റെ ശല്യമുണ്ടെന്ന പരാതിയെ തുടര്‍ന്ന് റേഞ്ച് എക്‌സൈസ് ഇന്‍സ്‌പെക്ടര്‍ ഹരിനന്ദന്റെ നേതൃത്വത്തിലുള്ള എക്‌സൈസ് സംഘം അന്വേഷിക്കാനെത്തിയതായിരുന്നു. നോബി സംഘത്തിനുനേരെ റോട്ട് വീലര്‍ ഇനത്തില്‍പ്പെട്ട നായയെ അഴിച്ചുവിട്ട ശേഷം കഠാരവീശി ആക്രമിക്കാന്‍ ശ്രമിക്കുകയായിരുന്നു.
ഏറെനേരം എക്‌സൈസ് സംഘത്തെ വലച്ച നോബിയെ പിന്നീട് കീഴ്‌പ്പെടുത്തി.
ഇയാളില്‍നിന്ന് അഞ്ചുപൊതി കഞ്ചാവ് കണ്ടെടുത്തു. നോബി നിരവധി ഗുണ്ടാ കേസുകളില്‍ ഉള്‍പ്പെട്ടയാളാണ്. പ്രിവന്റീവ് ഓഫിസര്‍മാരായ പി.ജി ശിവശങ്കരന്‍, കെ.എം സജീവ്, കെ.എസ് സതീഷ്‌കുമാര്‍, ഗ്രേഡ് പ്രിവന്റീവ് ഓഫിസര്‍മാരായ എ.സി ജോസഫ്, ജെയിസണ്‍ ജോസ് സിവില്‍ എക്‌സൈസ് ഓഫിസര്‍മാരായ ടി.ആര്‍ സുനില്‍, കൃഷ്ണപ്രസാദ്, എം.ജി ഷാജു എന്നിവരുടെ നേതൃത്വത്തിലായിരുന്നു പരിശോധന