കോട്ട: ട്രാഫിക് നിയമം ലംഘിച്ചതിന് ഫൈന്‍ നല്‍കിയതില്‍ കുപിതനായി ബിജെപി എംഎല്‍എയുടെ ഭര്‍ത്താവ് പൊലിസ് ഉദ്യോഗസ്ഥനെ പരസ്യമായി തല്ലി. സംഘമായി പൊലിസ് സ്റ്റേഷനിലെത്തിയാണ് ഇവര്‍ പൊലിസുകാരെ കയ്യേറ്റം ചെയ്തത്.

ചന്ദ്ര കാന്ത മേഘവാള്‍ എന്ന ബിജെപി എംഎല്‍എയുടെ ഭര്‍ത്താവ് നരേന്ദ്ര മേഘവാള്‍ ആണ് പൊലിസുകാരനെ കൈകാര്യം ചെയ്തത്. രാജസ്ഥാനിലെ കോട്ടയിലാണ് സംഭവം. പൊലിസുകാരനെ തല്ലിയതോടെ മറ്റ് പൊലിസുകാര്‍ സംഘത്തിന് നേരെ ലാത്തിവീശി. സംഘം പൊലിസിനു നേരെ കല്ലെറിഞ്ഞു.

മേഘവാളിനെതിരെയും ആറോളം പ്രവര്‍ത്തകര്‍ക്കെതിരെയും പൊലിസ് കേസെടുത്തു. എന്നാല്‍ പൊലിസുകാര്‍ തന്റെ ഭര്‍ത്താവിന് നേരെയും പ്രവര്‍ത്തകര്‍ക്കു നേരെയും ആക്രമണം അഴിച്ചുവിടുകയായിരുന്നുവെന്ന് എംഎല്‍എ പ്രതികരിച്ചു. ചില പ്രവര്‍ത്തകരെ ആശുപത്രിയില്‍ പ്രവേശിപ്പിച്ചിരിക്കുകയാണ്. ഇതിനിടെ തന്റെ സാരി കീറിയതായും വളകള്‍ പൊട്ടിയതായും എം.എല്‍.എ പറഞ്ഞു.