ന്യൂഡല്‍ഹി: പുതിയ സൈനിക മേധാവിയെ പരിഹസിച്ച് കോണ്‍ഗ്രസ് നേതാവ് അധിര്‍ രഞ്ജന്‍ ചൗധരി. സര്‍ക്കാരിന്റെ സമ്മതം ലഭിക്കുകയാണെങ്കില്‍ പാക് അധീന കശ്മീര്‍ തിരിച്ചുപിടിക്കാന്‍ തങ്ങള്‍ സജ്ജമാണെന്ന പ്രസ്താവനക്കെതിരെയാണ് കോണ്‍ഗ്രസ് നേതാവിന്റെ പ്രതികരണം. നിങ്ങള്‍ ആദ്യം നാവടക്കി ജോലി ചെയ്യൂ എന്നാണ് പുതിയ സൈനിക തലവന്‍ ജനറല്‍ മനോജ് മുകുന്ദ് നര്‍വേനിനോട് അദ്ദേഹം ആവശ്യപ്പെട്ടത്.

1994ല്‍ പാര്‍ലമെന്റ് ഐക്യകണ്‌ഠേന പാസാക്കിയ പ്രമേയം സൂചിപ്പിച്ചാണ് ചൗധരി മനോജ് മുകുന്ദിനോടുള്ള പ്രസ്താവന നടത്തിയത്. ജമ്മു കശ്മീര്‍ രാജ്യത്തിന്റെ അവിഭാജ്യഘടകമാണെന്നും ഈ പ്രദേശങ്ങളില്‍ നിന്നും പാക്കിസ്താന്‍ പൂര്‍ണമായും സൈനിക വിന്യാസം പിന്‍വലിക്കണമെന്നുമായിരുന്നു അന്നത്തെ പ്രമേയം. സൈനിക മേധാവി അറിയാന്‍, പാര്‍ലിമെന്റ് ഇതുസംബന്ധിച്ച പ്രമേയം 1994ല്‍ തന്നെ കൊണ്ടുവന്നിട്ടുണ്ട്, കശ്മീരില്‍ എന്തുതീരുമാനമാണെടുക്കേണ്ടതെന്നും നടപടി കൈക്കൊള്ളാന്‍ നിര്‍ദേശം നല്‍കാനും കേന്ദ്രസര്‍ക്കാരിന് അവസരമുണ്ട്. നിങ്ങള്‍ തല്‍ക്കാലം മുന്‍ മേധാവി ബിപിന്‍ റാവത്തിനോടും നരേന്ദ്രമോദിയോടും കെട്ടുകഥ പറഞ്ഞിരുന്നോളൂ എന്നിങ്ങനെ പോകുന്നു അധിര്‍ രഞ്ജന്‍ ചൗധരിയുടെ ട്വീറ്റ്.