കല്ലമ്പലം : ദേശീയപാതയില്‍ നാവായിക്കുളം ഇരുപത്തെട്ടാംമൈല്‍ ജങ്ഷനില്‍ ഉണക്ക മരം കടപുഴകി വീണ് കാത്തിരുപ്പുകേന്ദ്രം തകര്‍ന്നു.
സംഭവം കഴിഞ്ഞ ദിവസം പുലര്‍ച്ചെയായതിനാല്‍ ആളപായമുണ്ടായില്ല. വര്‍ഷങ്ങള്‍ പഴക്കമുള്ള മരം ഉണങ്ങി അപകടാവസ്ഥയിലായതോടെ നാട്ടുകാര്‍ അധികൃതരെ അറിയിച്ചെങ്കിലും നടപടിയുണ്ടായില്ല.
മാസങ്ങള്‍ക്ക് മുന്‍പ് പി.ഡബ്ലി.യു.ഡി മരത്തില്‍ നമ്പര്‍ പതിച്ചതോടെ ഉടനെ മുറിച്ചുമാറ്റുമെന്ന് നാട്ടുകാര്‍ കരുതിയെങ്കിലും അതുണ്ടായില്ല.
മരം വീണ് മേല്‍കൂര തകര്‍ന്നതിനാല്‍ ആര്‍ക്കും ഉള്ളില്‍ പ്രവേശിക്കാന്‍ കഴിയില്ല. പുഴുതുവീണ മരം നീക്കം ചെയ്ത് ബസ് സ്റ്റോപ്പില്‍ വരുന്നവരുടെ ബുദ്ധി മുട്ട് പരിഹരിക്കണമെന്ന് നാട്ടുകാര്‍ ആവശ്യപ്പെട്ടു.