റിയാദ്: റിയാദിലുണ്ടായ വാഹനാപകടത്തില്‍ ആലപ്പുഴ സ്വദേശി മരിക്കുകയും രണ്ടു പേര്‍ക്ക് പരുക്കേല്‍ക്കുകയും ചെയ്തു. ആലപ്പുഴ തിരുവമ്പാടി ബീച്ച് വാര്‍ഡ് സ്വദേശി റോബിനാണ് (36) മരിച്ചത്. ഇയാളോടൊപ്പമുണ്ടായിരുന്ന ആലപ്പുഴ സ്വദേശി രാജുമോന്‍, കൊല്ലം സ്വദേശി ഉണ്ണി എന്നിവര്‍ക്കാണ് പരിക്കേറ്റത്.

മരിച്ച റോബിന്റെ മൃതദേഹം റിയാദ് ശുമൈസി ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. പരിക്കേറ്റവര്‍ മന്‍ഫുഅ ആശുപത്രില്‍ ചികിത്സയിലുമാണ്.

കഴിഞ്ഞ വെള്ളിയാഴ്ച്ചയാണ് സംഭവം നടന്നത്. റിയാദ് അല്‍ ഖര്‍ജ് റോഡില്‍ എക്‌സിറ്റ് 18 നു സമീപം റോഡ് മുറിച്ചു കടക്കുന്നതിനിടെ അമിത വേഗതയിലെത്തിയ ജി എം സി കാര്‍ തട്ടിയാണ് അപകടം.

വാരാന്ത്യ അവധിദിനമായതിനാല്‍ മൂന്നു പേരും കൂടി റോബിന്റെ മുറിയിലെത്തിയിരുന്നു. അവിടെനിന്നു താമസസ്ഥലത്തേക്ക് പോകുന്നതിനിടയിലാണ് അപകടം. ഇവരെ തട്ടി തെറിപ്പിച്ചു നിയന്ത്രണം വിട്ട വാഹനം മറ്റൊരു വാഹനത്തിലും ചെന്നിടിച്ചു.
ഫ്‌ലോറന്‍സാണ് മരിച്ച റോബിന്റെ പിതാവ്. ഫോലോമിന മാതാവാണ്. ഭാര്യ റോസ് മേരി. ഒരു പെണ്‍കുട്ടിയുണ്ട് .