തൃശൂര്‍: കേന്ദ്ര സര്‍ക്കാരിന്റെ ജനവിരുദ്ധ തൊഴിലാളി വിരുദ്ധ നയങ്ങള്‍ക്കെതിരേ ദേശീയ ട്രേഡ് യൂനിയനുകളും സര്‍വിസ് സംഘടനകളുടെ ഫെഡറേഷനുകളും സംയുക്തമായി എട്ട്, ഒന്‍പത് തിയതികളില്‍ പ്രഖ്യാപിച്ച ദേശീയ പണിമുടക്കിന് യുനൈറ്റ് നഴ്‌സസ് അസോസിയേഷന്‍ (യു.എന്‍.എ) പിന്തുണ പ്രഖ്യാപിച്ചു.
മുന്‍പും രാജ്യത്തെ തൊഴിലാളി പണിമുടക്കുകളില്‍ യു.എന്‍.എ ഐക്യദാര്‍ഢ്യം പ്രഖ്യാപിച്ചിരുന്നു.
ലക്ഷക്കണക്കിന് വരുന്ന നഴ്‌സിങ്, നഴ്‌സിങ് ഇതര ആശുപത്രി ജീവനക്കാര്‍ക്കുള്‍പ്പടെ നിലവില്‍ കിട്ടിക്കൊണ്ടിരുന്ന ആനുകൂല്യങ്ങളെല്ലാം ഇല്ലാതാക്കുകയാണ്. വിലക്കയറ്റത്തിന്റെ തോതും ജീവിത സാഹചര്യങ്ങളും പരിഗണിച്ച് അവിദഗ്ധ തൊഴിലാളികള്‍ക്ക് 24,000 മുതല്‍ 26,000 രൂപവരെ മിനിമം കൂലി ലഭിക്കണമെന്നത് ന്യായമായ ആവശ്യമാണ്. ജനങ്ങളെ നേരിട്ടു ബാധിക്കുന്ന മേഖലയായതിനാല്‍ ആശുപത്രികളുടെ പ്രവര്‍ത്തനങ്ങളെ സ്തംഭിപ്പിക്കും വിധം പൂര്‍ണമായി പണിമുടക്കാന്‍ നഴ്‌സുമാര്‍ക്കാവില്ല. ഈ സാഹചര്യത്തില്‍ പ്രഖ്യാപിത പണിമുടക്ക് ദിവസങ്ങളില്‍ ആവശ്യത്തിന് നഴ്‌സിങ് ജീവനക്കാരെ വിട്ടുനല്‍കാനും മറ്റുള്ളവരുടെ നേതൃത്വത്തില്‍ പണിമുടക്ക് പ്രചാരണ, പ്രക്ഷോഭങ്ങളില്‍ അണിനിരക്കാനും തീരുമാനിച്ചു.