തിരുവനന്തപുരം: കെ.പി.സി.സി എക്‌സിക്യൂട്ടീവ് യോഗം ഇന്നു രാവിലെ പത്തിന് ഇന്ദിരാ ഭവനില്‍ നടക്കും. ഇന്നലെ സമാപിച്ച യു.ഡി.എഫിന്റെ അഞ്ച് മേഖലാ ജാഥകളുടെ വിലയിരുത്തലും പലയിടങ്ങളിലും സംഘാടനത്തിലുണ്ടായ പിഴവും യോഗത്തില്‍ ചര്‍ച്ചയാകും. ലോ അക്കാദമി സമരം മുതല്‍ കേന്ദ്ര, സംസ്ഥാന സര്‍ക്കാരുകള്‍ക്ക് എതിരായി നടന്ന സമരങ്ങളും തുടര്‍ സമരങ്ങളും ചര്‍ച്ച ചെയ്യും.
നേതാക്കളുടെ അസൗകര്യത്തെ തുടര്‍ന്ന് മാറ്റി വച്ച കെ.പി.സി.സി രാഷ്ട്രീയകാര്യ സമിതി യോഗം അടുത്തമാസം 11ന് നടക്കും. പ്രധാന നേതാക്കളുടെ സൗകര്യം നോക്കി തിയതി നിശ്ചയിക്കുന്നതിലെ പ്രയാസം കണക്കിലെടുത്ത് എല്ലാ മാസവും രണ്ടാം ശനിയാഴ്ച രാഷ്ട്രീയ കാര്യ സമിതി ചേരണമെന്ന് ജനുവരിയിലെ യോഗത്തില്‍ തീരുമാനിച്ചിരുന്നെങ്കിലും നേതാക്കളുടെ അസൗകര്യം കാരണം ആദ്യ മാസം തന്നെ ഈ തീരുമാനം നടപ്പാക്കാന്‍ കഴിഞ്ഞില്ല. മാര്‍ച്ചിലെ രണ്ടാം ശനിയാഴ്ചയായ 11ന് തന്നെയാണ് യോഗം നിശ്ചയിച്ചിരിക്കുന്നത്. യു.ഡി.എഫ് ഉന്നതാധികാര സമിതി യോഗം നാളെ രാവിലെ 11ന് കന്റോണ്‍മെന്റ് ഹൗസില്‍ ചേരും.