മാലെ: എ.എഫ്.സി കപ്പ് ദക്ഷിണ മേഖല പ്ലേയോഫ് പോരാട്ടത്തില്‍ കൊല്‍ക്കത്തന്‍ കരുത്തരായ മോഹന്‍ ബഗാനു സമനില. എവേ പോരാട്ടത്തില്‍ മാലിദ്വീപ് ടീം വലെന്‍സിയയുമായി മോഹന്‍ ബഗാന്‍ 1-1നു സമനില പാലിച്ചു. കളിയുടെ അഞ്ചാം മിനുട്ടില്‍ തന്നെ ഡാരില്‍ ഡഫിയിലൂടെ മോഹന്‍ ബഗാന്‍ മുന്നില്‍ കടന്നു. എന്നാല്‍ 72ാം മിനുട്ടില്‍ പെനാല്‍റ്റി വഴങ്ങേണ്ടി വന്നതോടെയാണു ബഗാന്‍ വിജയം കൈവിട്ടത്. വലെന്‍സിയക്കായി കിക്കെടുത്ത ഗോഡ്‌ഫ്രെ വെസ്റ്റ് ഒമഡുവിന്റെ ഷോട്ട് വലയില്‍ കയറിയതോടെ പോരാട്ടം 1-1നു സമനിലയില്‍ അവസാനിക്കുകയായിരുന്നു. എവേയില്‍ ഒരു ഗോള്‍ നേടിയതിനാല്‍ സമനിലയാണെങ്കിലും സ്വന്തം തട്ടകത്തില്‍ നടക്കുന്ന രണ്ടാം പാദ പോരാട്ടത്തില്‍ ആത്മവിശ്വാസത്തോടെ മോഹന്‍ ബഗാനിറങ്ങാം.
പ്രധാന താരങ്ങളില്‍ പലര്‍ക്കും വിശ്രമം നല്‍കിയാണു ബഗാന്‍ കളത്തിലറങ്ങിയത്. ഷില്‍ട്ടന്‍ പോള്‍, ബല്‍വന്ത് സിങ്, ഡാരില്‍ ഡഫി, കാത്സുമി യുസ, ബിക്രംജീത് സിങ്, റയ്‌നീര്‍ ഫെര്‍ണാണ്ടസ് എന്നിവര്‍ ആദ്യ ഇലവനില്‍ ഇടം പിടിച്ചു.