കൊളംബോ: ത്രില്ലര്‍ പോരാട്ടത്തില്‍ ദക്ഷിണാഫ്രിക്കയെ ഒറ്റ വിക്കറ്റിനു കീഴടക്കി ഇന്ത്യ വനിതാ ലോകകപ്പ് ക്രിക്കറ്റ് യോഗ്യതാ പോരാട്ടത്തില്‍ കിരീടം സ്വന്തമാക്കി. ആദ്യം ബാറ്റു ചെയ്ത ദക്ഷിണാഫ്രിക്കന്‍ വനിതകള്‍ 49.4 ഓവറില്‍ 244 റണ്‍സിനു പുറത്തായി. ഇന്ത്യന്‍ വനിതകള്‍ 50 ഓവറില്‍ ഒന്‍പതു വിക്കറ്റ് നഷ്ടത്തില്‍ 245 റണ്‍സെടുത്ത് വിജയിക്കുകയായിരുന്നു.
അവസാന ഓവറില്‍ ഇന്ത്യക്ക് ജയിക്കാന്‍ ഒന്‍പതു റണ്‍സായിരുന്നു വേണ്ടിയിരുന്നത്. ആദ്യ പന്തില്‍ രണ്ടാം റണ്ണിനോടി പൂനം യാദവ് റണ്ണൗട്ടായതോടെ വിജയ ലക്ഷ്യം അഞ്ചു പന്തില്‍ എട്ട് എന്ന നിലയിലായി. രണ്ടും മൂന്നും നാലും പന്തില്‍ റണ്ണൊന്നുമെടുക്കാന്‍ ഇന്ത്യക്കായില്ല. ഇതോടെ ലക്ഷ്യം രണ്ടു പന്തില്‍ എട്ട് എന്ന നില. എന്നാല്‍ അഞ്ചാം പന്തില്‍ ഹര്‍മന്‍പ്രീത് കൗര്‍ സിക്‌സര്‍ പായിച്ചതോടെ വിജയത്തിലേക്കു ഒരു പന്തും രണ്ടു റണ്‍സും. അവസാന പന്തില്‍ ഹര്‍മന്‍പ്രീത് രണ്ടു റണ്‍സ് ഓടിയെടുത്തു.
വിജയിക്കുമ്പോള്‍ ഹര്‍മന്‍പ്രീതിനു കൂട്ടായി രാജേശ്വരി ഗെയ്ക്‌വാദായിരുന്നു ക്രീസില്‍. 41 പന്തില്‍ 41 റണ്‍സുമായി ഹര്‍മന്‍പ്രീത് പുറത്താകാതെ നിന്നു. 71 റണ്‍സെടുത്ത ദീപ്തി ശര്‍മയാണു ടോപ് സ്‌കോറര്‍. മോന മെഷ്‌റം 59 റണ്‍സെടുത്തു. മിതാലി രാജിന്റെ അഭാവത്തില്‍ ഹര്‍മന്‍പ്രീത് കൗറാണു ഇന്ത്യയെ നയിച്ചതും.
ആദ്യം ബാറ്റു ചെയ്ത ദക്ഷിണാഫ്രിക്കക്കായി മിഗ്നോന്‍ ഡു പ്രീസ് (40), ലിസെല്ലെ ലീ (37), സണ്ണി ലസ് (35) എന്നിവര്‍ തിളങ്ങി. ഇന്ത്യന്‍ നിരയില്‍ രാജേശ്വരി ഗെയ്ക്‌വാദ് മൂന്നും ശിഖ പാണ്ഡെ രണ്ടും വിക്കറ്റുകള്‍ വീഴ്ത്തി. ദീപ്തി ശര്‍മ ഫൈനലിലെ താരമായപ്പോള്‍ ദക്ഷിണാഫ്രിക്കയുടെ സണ്ണി ലസാണു ടൂര്‍ണമെന്റിന്റെ താരം.