ജിദ്ദ: ഒടുവില്‍ ഷാനവാസിന് നാട്ടിലേക്ക് തിരിച്ചുപോകാനായി. വെറും കൈയോടെ. ഒരു വര്‍ഷം മുന്‍പാണ് ഹൗസ് ഡ്രൈവര്‍ വിസയില്‍ മലപ്പുറം കാഞ്ഞിരപ്പുഴ സ്വദേശി പറമ്പില്‍ പീടികയില്‍ ഷാനവാസ് റിയാദിലെത്തിയത്.
അഞ്ചു മാസത്തോളം ജോലി ചെയ്തിട്ടും സ്‌പോണ്‍സര്‍ ഡ്രൈവിംഗ് ലൈസന്‍സ് എടുത്തു നല്‍കിയിരുന്നില്ല. ശമ്പളവും നല്‍കിയില്ല. തുടര്‍ന്ന് എംബസിയില്‍ പരാതി നല്‍കി. മൂന്ന് മാസമായി കേസുമായി നടക്കുന്നതിനിടെയാണ് സ്‌പോണ്‍സര്‍ ഹുറൂബ് ആക്കിയതറിയുന്നത്. ലേബര്‍ കോടതിയിലെ കേസ് തന്റെ അറിവില്ലാതെ പിന്‍വലിക്കുകയും ചെയ്തിരുന്നു.
ജോലിയും ശമ്പളവുമില്ലാതെ എട്ടു മാസമായി സുഹൃത്തുക്കളുടെ സഹായത്തോടെ കഴിഞ്ഞിരുന്ന ഷാനവാസിന് കേളി പ്രവര്‍ത്തകരുടെ സഹായത്തോടെയാണ് നാടണയാനായത്.