തൊടുപുഴ: ഭക്തിയുടെ പേരില്‍ നടക്കുന്ന ആക്രമണം അംഗീകരിക്കാന്‍ കഴിയുന്ന കാര്യമല്ലെന്നും അയ്യപ്പനുവേണ്ടി ആക്രമം നടത്തുന്നവര്‍ അയ്യപ്പനേക്കാള്‍ വലിയവരല്ലെന്നും മന്ത്രി കെ.കെ ശൈലജ. തൊടുപുഴയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അവര്‍.
തെറ്റ് ചെയ്തിട്ട് അയ്യപ്പന്റെ മുന്നില്‍ ചെല്ലുന്നവര്‍ക്ക് തിരിച്ചു വരാന്‍ കഴിയുമോ. എന്തും ചെയ്യാമെന്ന തോന്നല്‍ ഉള്ളതിനാലാണ് വിശ്വാസത്തിന്റെ പേരില്‍ ഇത്തരത്തില്‍ പേകൂത്ത് കാട്ടുന്നത്.

ഭക്തിയുടെ പേരില്‍ ഇപ്പോള്‍ നടക്കുന്ന ആക്രമണം അവസാനിപ്പിക്കാന്‍ പൊതുജനങ്ങള്‍ ഒരുമിച്ച് നില്‍ക്കണം. അക്രമകാരികള്‍ക്കൊപ്പം കോണ്‍ഗ്രസ് നില്‍ക്കുന്നതാണ് വിരോധാഭാസം.
ശബരിമലയില്‍ സ്ത്രീകള്‍വന്ന് പ്രാര്‍ഥിക്കുന്നു, അവര്‍ തിരിച്ചു പോകുന്നു. സ്ത്രീകള്‍വന്ന് അവിടെ കുഴപ്പങ്ങള്‍ ഉണ്ടാക്കുന്നുണ്ടെങ്കില്‍ അവര്‍ക്കെതിരേ ശിക്ഷാ വിധികള്‍ നടപ്പിലാക്കാം.

സ്ത്രീകള്‍വന്ന് പ്രാര്‍ഥിച്ചിട്ട് സമാധാനത്തോടെ തിരിച്ചുപോകുന്നതില്‍ മറ്റുള്ളവര്‍ക്കെന്താണ് വിഷമമെന്ന് മന്ത്രി ചോദിച്ചു. ഇപ്പോള്‍ നടക്കുന്നത് വലിയ തോതിലുള്ള അസഹിഷ്ണുതയാണ്. ഇത് വൃത്തികെട്ട രാഷ്ട്രീയ കളിയാണെന്നും മന്ത്രി കൂട്ടിച്ചേര്‍ത്തു.