കൊച്ചി: ശബരിമലയില്‍ യുവതികള്‍ ദര്‍ശനം നടത്തിയതിനുശേഷം ഒരുമണിക്കൂറോളം നടയടച്ച് ശുദ്ധികലശം നടത്തിയ തന്ത്രി ബ്രാഹ്മണ രാക്ഷസനാണെന്ന് മന്ത്രി ജി. സുധാകരന്‍. തന്ത്രി ജാതി പിശാചിന്റെ പ്രതീകമാണ്. അയ്യപ്പനോട് അദ്ദേഹത്തിന് സ്‌നേഹവും കൂറും ബഹുമാനവുമില്ല.
നടയടച്ച് പാട്ടിന് പോകുമെന്ന് പറയുന്ന തന്ത്രി അയ്യപ്പനെ ആരെ ഏല്‍പിച്ച് പോകുമെന്നാണ് പറയുന്നതെന്ന് അറിയില്ല. സ്ത്രീയെ മ്ലേച്ഛമായി കണ്ട് ശുദ്ധികലശം നടത്തിയ തന്ത്രി മനുഷ്യനാണോയെന്നും മന്ത്രി ചോദിച്ചു. ബ്രാഹ്മണ മേധാവിത്വത്തിന്റെ വീഴ്ചയുടെ തുടക്കമാണിത്. നടയടച്ച് ശുദ്ധികലശം നടത്തിയത് അയിത്തത്തിന്റെ ഭാഗമാണ്. തന്ത്രിയെ മാറ്റണമെന്ന് തീരുമാനിക്കേണ്ടത് ദേവസ്വം ബോര്‍ഡാണെന്നും മന്ത്രി കൊച്ചിയില്‍ മാധ്യമപ്രവര്‍ത്തകരോട് പറഞ്ഞു.