പനാജി: ഫ്രാന്‍സുമായുള്ള റാഫേല്‍ യുദ്ധവിമാന കരാറുമായി ബന്ധപ്പെട്ട നിര്‍ണായകമായ ചില രേഖകള്‍ ഗോവ മുഖ്യമന്ത്രി മനോഹര്‍ പരീക്കറുടെ കൈവശമുണ്ടെന്ന വെളിപ്പെടുത്തലിന്റെ പശ്ചാത്തലത്തില്‍ അദ്ദേഹത്തിന്റെ സുരക്ഷ വര്‍ധിപ്പിക്കണമെന്ന് കോണ്‍ഗ്രസ്. ഇന്നലെ രാഷ്ട്രപതി രാംനാഥ് കോവിന്ദിന് ഇതുസംബന്ധിച്ച് കത്തയക്കുകയും ചെയ്തതായി കോണ്‍ഗ്രസ് നേതാവ് ഗിരീഷ് ഛോദാന്‍കര്‍ അറിയിച്ചു.
കഴിഞ്ഞ ദിവസമാണ് ഗോവ ആരോഗ്യമന്ത്രി വിശ്വജിത്ത് റാണെയുടേതെന്ന് അവകാശപ്പെട്ടുള്ള ഒരു ശബ്ദസന്ദേശം പുറത്തുവന്നത്. റാഫേല്‍ ഇടപാടുമായി ബന്ധപ്പെട്ട രേഖകള്‍ പരീക്കറുടെ താമസ സ്ഥലത്തുണ്ടെന്നാണ് വിശ്വജിത്ത് റാണെ അവകാശപ്പെട്ടത്. ഇക്കാര്യം വെളിപ്പെട്ട സാഹചര്യത്തില്‍ പരീക്കറുടെ ജീവനു ഭീഷണിയുണ്ടാകുമെന്ന് ചൂണ്ടിക്കാട്ടി അദ്ദേഹത്തിന് സുരക്ഷ വര്‍ധിപ്പിക്കണമെന്നാവശ്യപ്പെട്ട് കോണ്‍ഗ്രസ് രംഗത്തെത്തുകയായിരുന്നു.
കഴിഞ്ഞ ചൊവ്വാഴ്ചയാണ് കോണ്‍ഗ്രസ് വക്താവ് രണ്‍ദീപ് സുര്‍ജേവാല വിവാദ ശബ്ദസന്ദേശം പുറത്തുവിട്ടത്. ഇടപാടുമായി ബന്ധപ്പെട്ട മുഴുവന്‍ രേഖകളും അന്നത്തെ പ്രതിരോധ മന്ത്രിയായിരുന്ന മനോഹര്‍ പരീക്കറുടെ കിടപ്പുമുറിയില്‍ ഉണ്ടെന്നാണ് വിശ്വജിത്ത് റാണെ പറഞ്ഞത്. എന്നാല്‍, കോണ്‍ഗ്രസിന്റെ അവകാശവാദം കെട്ടിച്ചമച്ചതാണെന്ന് ചൂണ്ടിക്കാട്ടി വിശ്വജിത്ത് റാണെ ബി.ജെ.പി അധ്യക്ഷന്‍ അമിത്ഷായ്ക്ക് കത്തയച്ചിരുന്നു. അതേസമയം ഈ ശബ്ദസന്ദേശം അടുത്ത ലോക്‌സഭാ തെരഞ്ഞെടുപ്പില്‍ പാര്‍ട്ടിക്ക് വലിയ ക്ഷീണമുണ്ടാക്കുമെന്ന് ബി.ജെ.പിയിലെ പല മുതിര്‍ന്ന നേതാക്കളും ചൂണ്ടിക്കാട്ടുന്നുണ്ട്.