ഗോവ: ഏകപക്ഷീയമായ രണ്ട് ഗോളിന് മിനര്‍വ പഞ്ചാബിനെ കീഴടക്കി ചര്‍ച്ചില്‍ ബ്രദേഴ്‌സ് ഐ ലീഗില്‍ പോരാട്ടം ശക്തമാക്കി. 61, 84 മിനുട്ടുകളില്‍ അന്തോണി വോള്‍ഫ് നേടിയ ഇരട്ടഗോളുകള്‍ക്കാണ് ചര്‍ച്ചില്‍ മിനര്‍വയെ കീഴടക്കിയത്. 11 കളികളില്‍നിന്ന് 19 പോയിന്റുമായി ചര്‍ച്ചില്‍ ലീഗില്‍ മൂന്നാം സ്ഥാനത്തെത്തി. മിനര്‍വ പഞ്ചാബ് ഏഴാം സ്ഥാനത്താണ്.

ഗോള്‍ രഹിതമായിരുന്നു ആദ്യപകുതി. അവസരങ്ങള്‍ ഇരുടീമുകളും സൃഷ്ടിച്ചെങ്കിലും മുതലാക്കാനായില്ല. രണ്ടാം പകുതിയില്‍ പകരക്കാരനായി എത്തിയാണ് വോള്‍ഫ് ചര്‍ച്ചിലിന് വിജയ ഗോളുകള്‍ സമ്മാനിച്ചത്. കളത്തിലിറങ്ങി അഞ്ചു മിനുട്ടുകള്‍ക്കകം തന്നെ വോള്‍ഫ് മിനര്‍വയുടെ വലകുലുക്കി. 61 ാം മിനുട്ടില്‍ വോള്‍ഫ് ഹെഡ്ഡറിലൂടെയാണ് ചര്‍ച്ചിലിനെ മുന്നിലെത്തിച്ചത്. 83 ാം മിനുട്ടില്‍ പെനാല്‍റ്റിയിലൂടെയായിരുന്നു ചര്‍ച്ചിലിനായി വോള്‍ഫ് വീണ്ടും വലകുലുക്കിയത്.