തിരുവനന്തപുരം: കേരള ക്രിക്കറ്റ് അസോസിയേഷന്റെ ആഭിമുഖ്യത്തില്‍ സ്‌പോര്‍ട്‌സ് എക്‌സോട്ടിക്ക സംഘടിപ്പിക്കുന്ന ആദ്യത്തെ കേരള കോളജ് പ്രീമിയര്‍ ലീഗ് ടി20 ക്രിക്കറ്റ് ചാംപ്യന്‍ഷിപ്പ് ഏഴ് മുതല്‍ ഫെബ്രുവരി മൂന്ന് വരെ നടക്കും. തലശ്ശേരി, എറണാകുളം, തിരുവനന്തപുരം എന്നിവിടങ്ങളിലാണ് പ്രാഥമിക മത്സരങ്ങള്‍ നടക്കുക.

കേരളത്തിന്റെ ഭാവി വാഗ്ദാനങ്ങളായ ക്രിക്കറ്റ് പ്രതിഭകളെ കണ്ടെത്തുകയെന്ന കെ.സി.എയുടെ ലക്ഷ്യത്തെ സാക്ഷാത്ക്കരിക്കുകയാണ് ടൂര്‍ണമെന്റിലൂടെ സ്‌പോര്‍ട്‌സ് എക്‌സോട്ടിക്ക ചെയ്യുന്നത്. കേരള കോളജ് ക്രിക്കറ്റ് ചരിത്രത്തില്‍ ആദ്യമായാണ് ഇത്രയും വിപുലമായ സജ്ജീകരണങ്ങളോടെ നിരവധി യൂനിവേഴ്‌സിറ്റികളെ ഒരു കുടക്കീഴില്‍ ഉള്‍പ്പെടുത്തി ടൂര്‍ണമെന്റ് നടത്തുന്നത്.

30 ദിവസം നീണ്ടു നില്‍ക്കുന്ന ടൂര്‍ണമെന്റില്‍, 52 മത്സരങ്ങളില്‍ 700 ല്‍ പരം പ്രതിഭകള്‍ കേരളത്തിലുടനീളമുള്ള 48 കോളജുകളില്‍ നിന്നായി പങ്കെടുക്കും. മൂന്നു മേഖലകള്‍ ആയി തിരിച്ചാണ് മത്സരങ്ങള്‍ ക്രമീകരിച്ചിരിക്കുന്നത്. ഫൈനല്‍ ഫെബ്രുവരി മൂന്നിന് തിരുവനന്തപുരം ഗ്രീന്‍ഫീല്‍ഡ് ഇന്റര്‍നാഷനല്‍ ക്രിക്കറ്റ് സ്റ്റേഡിയത്തില്‍ ഫ്‌ളഡ്‌ലൈറ്റില്‍ നടക്കും. പിങ്ക് ബോളുകള്‍ ഉപയോഗിച്ചാണ് മത്സരങ്ങള്‍ നടത്തുന്നത് എന്ന പ്രത്യേകതയും കേരള കോളജ് പ്രീമിയര്‍ ലീഗ് ടി20 ടൂര്‍ണമെന്റിനുണ്ട്.