കോഴിക്കോട്: മിഠായിത്തെരുവില്‍ ഹര്‍ത്താല്‍ ദിനത്തില്‍ കടകള്‍ അടിച്ചുതകര്‍ക്കുകയും പ്രത്യേക മതവിഭാഗത്തിനു നേരെ കടുത്ത പരാമര്‍ശങ്ങളും നടത്തിയ സംഘ്പരിവാര്‍ പ്രതികള്‍ക്കെതിരേ കലാപാഹ്വാനത്തിന് കേസെടുത്തു.  പ്രതികള്‍ കലാപാഹ്വാനം നടത്തിയതടക്കമുള്ള ദൃശ്യങ്ങളുടെ കൂടി അടിസ്ഥാനത്തിലാണ് 153 എ പ്രകാരം ടൗണ്‍ പൊലിസ് കേസെടുത്തത്. ശബരിമല കര്‍മസമിതിയുടെ ഹര്‍ത്താലില്‍ തുറന്നുപ്രവര്‍ത്തിച്ച മിഠായിതെരുവിലെ കടകള്‍ക്കുനേരെ ആക്രമണം നടത്തിയിരുന്നു.
ഇതില്‍ 27 പേരെ കഴിഞ്ഞ ദിവസം പൊലിസ് അറസ്റ്റ് ചെയ്തിരുന്നു. ബി.ജെ.പിയുടേയും ആര്‍.എസ്.എസിന്റേയും സജീവ പ്രവര്‍ത്തകരാണ് എല്ലാവരും. ഇവര്‍ക്കെതിരേ ആദ്യഘട്ടത്തില്‍ വര്‍ഗീയ കലാപത്തിന് ആഹ്വാനം ചെയ്ത കുറ്റം ചുമത്തിയിരുന്നില്ല. തെളിവുകളുണ്ടായിട്ടും പ്രതികള്‍ക്കെതിരേ പൊലിസ് നടപടിയെടുക്കുന്നില്ലെന്ന വിമര്‍ശനങ്ങള്‍ക്കൊടുവിലാണ് ഇപ്പോള്‍ കലാപാഹ്വാനത്തിന് കേസെടുത്തിരിക്കുന്നത്. മിഠായിത്തെരുവ് ആക്രമണവുമായി ബന്ധപ്പെട്ട് 19 സംഘ്പരിവാര്‍ പ്രവര്‍ത്തകരെ വെള്ളിയാഴ്ചയും ഏഴുപേരെ ഇന്നലെയുമാണ് അറസ്റ്റ് ചെയ്തത്. നൂറോളം പേരാണ് കേസില്‍ പ്രതികളായിട്ടുള്ളത്. മിഠായിത്തെരുവിലെ കടകളിലുള്ള സി.സി.ടി.വി ദൃശ്യങ്ങളും മാധ്യമങ്ങളില്‍നിന്ന് പൊലിസ് ശേഖരിച്ച ദൃശ്യങ്ങളും പരിശോധിച്ചതിനുശേഷമാണ് പ്രതികളെ പിടികൂടിയത്.