അടിമാലി (ഇടുക്കി): സാഹസിക റൈഡിങ്ങിനിടെ വിനോദ സഞ്ചാരിയായ യുവതി ബൈക്കില്‍ നിന്ന് തെറിച്ച് വീണ് മരിച്ചു.
തൃപ്പുണിത്തുറ വടക്കേഭാഗം മല്ലശ്ശേരി പറമ്പില്‍ പരേതനായ രാജേന്ദ്രന്റെ മകള്‍ ചിപ്പി (23) ആണ് മരിച്ചത്. ശനിയാഴ്്ച്ച രാവിലെ 11 മണിയോടെ അടിമാലി കൂമ്പന്‍പാറയ്ക്ക് സമീപം പ്രവര്‍ത്തിക്കുന്ന ഹില്‍ടോപ്പ് സാഹസിക ബൈക്ക് റൈഡിങ് സ്ഥാപനത്തിലാണ് അപകടം. സുഹൃത്തുക്കളോടൊപ്പമാണ് ചിപ്പിയും സംഘവും മൂന്നാര്‍ സന്ദര്‍ശിക്കാന്‍ എത്തിയത്. കൂമ്പന്‍പാറയില്‍ വച്ച് ബൈക്കില്‍ സാഹസിക റൈഡിങ് നടത്തുന്നതിനിടെ ചിപ്പി ബൈക്കില്‍ നിന്നു തെറിച്ച് വീഴുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. തലയ്ക്കും മുഖത്തും ഗുരുതരമായി പരുക്കേറ്റ യുവതിയെ അടിമാലി മോണിങ് സ്റ്റാര്‍ ആശുപത്രിയില്‍ എത്തിച്ചതിന് ശേഷം ആലുവയിലേക്ക് കൊണ്ടുപോകുന്നതിനിടെ മരിക്കുകയായിരുന്നു. ചിപ്പി രാജഗിരി ആശുപത്രിയിലെ ജീവനക്കാരിയാണ്. തൃപ്പുണിത്തുറ നഗരസഭയിലെ സ്ഥിരം സമിതി അധ്യക്ഷ നിഷ രാജേന്ദ്രനാണ് മാതാവ്. നിജു ഏക സഹോദരന്‍. മൃതദേഹം പെരുമ്പാവൂരിലെ സ്വകാര്യ ആശുപത്രി മോര്‍ച്ചറിയില്‍.