തൊടുപുഴ: സമസ്ത കേരള ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ സംഘടിപ്പിക്കുന്ന 14 ാമത് ഇസ്‌ലാമിക കലാമേളയുടെ തൊടുപുഴ റെയ്ഞ്ച് തല മത്സരത്തില്‍ 139 പൊയിന്റുകളോടെ വണ്ണപ്പുറം നൂറുല്‍ ഇസ്‌ലാം മദ്‌റസാ ഓവറോള്‍ ജേതാക്കളായി.
തുടര്‍ച്ചയായി മൂന്നാം തവണയാണ് വണ്ണപ്പുറം ഓവറോള്‍ കരസ്ഥമാക്കുന്നത്. കിഡ്ഡീസ്, സബ് ജൂനിയര്‍, ജൂനിയര്‍, സീനിയര്‍, സൂപ്പര്‍ സീനിയര്‍ എന്നീ കാറ്റഗറിയിലായി 29 മദ്‌റസയില്‍ നിന്നും 200 ഓളം വിദ്യാര്‍ഥികളാണ് മത്സരത്തില്‍ പങ്കെടുത്തത്. രണ്ടാം സ്ഥാനം നാസ്വിറുല്‍ ഇസ്‌ലാം മദ്‌റസയും മൂന്നാം സ്ഥാനം ഹാജി അഹമദ് മുസ്‌ലിയാര്‍ മെമോറിയല്‍ വടക്കുംമുറി മദ്‌റസയും നിലനിര്‍ത്തി.
കുന്നം നാസ്വിറുല്‍ ഇസ്‌ലാം മദ്‌റസാ ഹാളില്‍ നടന്ന മേള മാനേജ്‌മെന്റ് അസോസിയേഷന്‍ ജില്ലാ പ്രസിഡന്റ് അലിക്കുഞ്ഞ് വാത്തിശേരി ഉദ്ഘാടനം ചെയ്തു. ജംഇയ്യത്തുല്‍ മുഅല്ലിമീന്‍ ജില്ലാ പ്രസിഡന്റ് എം.എസ് ഹാഷിം ബാഖവി അധ്യക്ഷനായി. പി.ഇ മുഹമ്മദ് ഫൈസി, എന്‍.കെ മൂസ മൗലവി, സിനാജ് പ്രസംഗിച്ചു. വൈകിട്ട് 4.30 ന് നടന്ന സമാപന സമ്മേളനം പി.ജെ ജോസഫ് എം.എല്‍.എ ഉദ്ഘാടനം ചെയ്തു. എം.എസ് അബ്ദുല്‍ കബീര്‍ റഷാദി അധ്യക്ഷനായി. മുഫത്തിഷ് അബ്ദുല്‍ ഗഫൂര്‍ അന്‍വരി ആമുഖപ്രഭാഷണവും മുഫത്തിഷ് കെ.ഇ മുഹമ്മദ് മുസ്‌ലിയാര്‍ മുഖ്യപ്രഭാഷണവും നിര്‍വഹിച്ചു. കെ.എച്ച് അബ്ദുല്‍ കരീം മൗലവി, ടി.കെ അബ്ദുല്‍ കബീര്‍ മൗലവി പ്രസംഗിച്ചു.
വണ്ണപ്പുറം ടൗണ്‍ ജമാഅത്ത് കമ്മിറ്റി അംഗങ്ങളായ ഷാജഹാന്‍ കൈനിക്കല്‍, ഹനീഫ തൊമരശ്ശേരിയില്‍ എന്നിവര്‍ ഓവറോള്‍ ട്രോഫി ഏറ്റുവാങ്ങി. നൂറുല്‍ ഇസ്‌ലാം മദ്‌റസയിലെ കലാപ്രതിഭകളെ വണ്ണപ്പുറം ടൗണ്‍ ജമാഅത്ത് കമ്മിറ്റി അനുമോദിച്ചു.