കൊച്ചി:  കൊച്ചിയില്‍ യുവനടിയെ ആക്രമിച്ച സംഭവവുമായി ബന്ധമുണ്ടെന്ന് പറയുന്ന യുവനടനെ പൊലിസ് ചോദ്യം ചെയ്തു. ആലുവയിലെ വീട്ടില്‍ മഫ്തിയിലെത്തിയായിരുന്നു ചോദ്യം ചെയ്യല്‍. കേസില്‍ സിനിമാ മേഖലയിലുള്ളവരുടെ പങ്കിനെ കുറിച്ചുള്ള അന്വേഷണവും പുരോഗമിക്കുകയാണ്. പിടിയിലായവരുടെ ഫോണ്‍രേഖകള്‍ പരിശോധിച്ചതില്‍ നിന്ന് സംഭവവുമായി സിനിമയില്‍ ഉള്ളവര്‍ക്ക് ബന്ധമുണ്ടെന്നതിന് വ്യക്തമായ സൂചനകള്‍ പൊലിസിന് ലഭിച്ചുവെന്നാണ് വിവരം.
അതിനിടെ പള്‍സര്‍ സുനി ഇന്ന് കീഴടങ്ങിയേക്കുമെന്ന് റിപ്പോര്‍ട്ടുണ്ട്. ഇയാളെ  പിടികൂടിയാല്‍ മാത്രമേ സംഭവത്തിന് പിന്നില്‍ ഗൂഢാലോചന നടത്തിയത് ആരാണെന്ന് വ്യക്തമാവുകയുള്ളൂ. മുന്‍കൂര്‍ ജാമ്യാപേക്ഷ പരിഗണിക്കുന്നത് കോടതി മാറ്റിവെച്ച സാഹചര്യത്തില്‍ പള്‍സര്‍ സുനിയെ പിടികൂടാനാണ് അന്വേഷണ സംഘത്തിന്റെ ശ്രമം.
കഴിഞ്ഞ ദിവസം പിടിയിലായ മണികണ്ഠനെ ചോദ്യം ചെയ്യുന്നത് തുടരുകയാണ്.