ഹോബര്‍ട്ട്: ഏറെ കാലത്തെ ഇടവേളക്ക് ശേഷം തിരിച്ചുവരവ് ഗംഭീരമാക്കി സാനിയ മിര്‍സ. ഉക്രൈനിന്റെ നാദിയ കിച്ചനോക്കുമൊപ്പം ഹോബര്‍ട്ട് ഇന്റര്‍നാഷനല്‍ വനിതാ ഡബിള്‍സില്‍ കോര്‍ട്ടിലിറങ്ങിയ സാനിയ ക്വാര്‍ട്ടറില്‍ പ്രവേശിച്ചു.
ഇഞ്ചോടിഞ്ച് പോരാട്ടത്തില്‍ ഒക്‌സാന കലാഷ്‌നിക്കോവ, മിയു കാറ്റോ സഖ്യത്തേയാണ് സാനിയയും പങ്കാളിയും പരാജയപ്പെടുത്തിയത്. ആദ്യ സെറ്റിലെ തോല്‍വിയോടെ സാനിയയുടെ ആത്മവിശ്വാസം നഷ്ടപ്പെടുമെന്നായിരുന്നു കരുതിയിരുന്നതെങ്കിലും ടൈബ്രേക്കറിലേക്ക് നീ@ണ്ട സെറ്റ് മുന്‍ ലോക ഒന്നാം നമ്പര്‍ താരവും പങ്കാളിയും ചേര്‍ന്ന് സ്വന്തമാക്കി മത്സരത്തിലേക്ക് തിരിച്ചെത്തി. നിര്‍ണായകമായ മൂന്നാം സെറ്റിലെ ടൈബ്രേക്കറിലും സാനിയയും നാദിയയും മികവ് തുടര്‍ന്നതോടെ എതിരാളികള്‍ മുട്ടുമടക്കുകയായിരുന്നു. ക്വാര്‍ട്ടറില്‍ അമേരിക്കന്‍ ജോടിയായ ക്രിസ്റ്റിന മക്‌ഹെല്‍, വനിയ കിങ് എന്നിവരാണ് എതിരാളികള്‍.
അമ്മയായശേഷം കഠിനമായ പരിശീലനത്തിലൂടെ താരം കോര്‍ട്ടില്‍ തിരിച്ചെത്തുകയായിരുന്നു. ചൈന ഓപ്പണില്‍ 2017 ഒക്ടോബറില്‍ കളിച്ച താരം കഴിഞ്ഞ ഒക്ടോബറിലാണ് ഒരു ആണ്‍കുട്ടിക്ക് ജന്മം നല്‍കിയത്. ഡബിള്‍സില്‍ മാര്‍ട്ടിന ഹിംഗിസുമൊത്ത് വിജയക്കുതിപ്പ് നടത്തിയ സാനിയ ഇപ്പോള്‍ ലോക റാങ്കിങ്ങില്‍ 38-ാം സ്ഥാനത്താണ്.