കോഴിക്കോട്: ഫെബ്രുവരി 23,24, 25,26 തിയതികളില്‍ നാദാപുരം ഹുദൈബിയ്യയില്‍ നടക്കുന്ന എസ്.കെ.എസ്.എസ്.എഫ് മദീന പാഷന്‍ ജില്ലാ സമ്മേളന നഗരിയില്‍ ഉയര്‍ത്താനുള്ള പതാക-കൊടിമര ജാഥകള്‍ ഇന്ന് നടക്കും.
പതാകജാഥ വരക്കാല്‍ മഖാം സിയാറത്തിനു ശേഷം ജില്ലാ പ്രസിഡന്റ് സയ്യിദ് മുബശ്ശിര്‍ ജമലുല്ലൈലി തങ്ങളുടെ നേതൃത്വത്തിലും കൊടിമരജാഥ മടവൂര്‍ മഖാം സിയാറത്തിനു ശേഷം ജില്ലാ ജനറല്‍ സെക്രട്ടറി ഒ.പി അഷ്‌റഫ് കുറ്റിക്കടവിന്റെ നേതൃത്വത്തിലും ഇന്ന് ഉച്ചയ്ക്ക് ഒന്നിനു പ്രയാണമാരംഭിക്കും.
വരക്കല്‍ മഖാമില്‍ കോഴിക്കോട് ഖാസി സയ്യിദ് മുഹമ്മദ് കോയ ജമലുല്ലൈലി തങ്ങളും മടവൂരില്‍ സമസ്ത മുശാവറ അംഗം വാവാട് കുഞ്ഞിക്കോയ മുസ്‌ലിയാരും സിയാറത്തിനു നേതൃത്വം നല്‍കും. നൂറുകണക്കിന് വിഖായ വളണ്ടിയര്‍മാര്‍ ഇരുചക്ര വാഹനങ്ങളില്‍ ജാഥയെ അനുഗമിക്കും.
വൈകിട്ട് അഞ്ചിനു സമാപന സമ്മേളന നഗരിയിലെത്തുന്ന ജാഥാംഗങ്ങളെ സ്വാഗതസംഘം രക്ഷാധികാരി മൊയ്തു ഹാജി പാലത്തായിയുടെ നേതൃത്വത്തില്‍ സ്വീകരിക്കും. പതാക ജാഥയെ ഖാസിം നിസാമി പേരാമ്പ്ര, നൂറുദ്ദീന്‍ ഫൈസി മുണ്ടുപാറ(വൈസ് ക്യാപ്റ്റന്മാര്‍), സലാം ഫറോക്ക് (ഡയറക്ടര്‍), ഷഫീക്ക് കായലം (അസി. ഡയറക്ടര്‍), അന്‍വര്‍ നല്ലളം (കോഡിനേറ്റര്‍), അബ്ദുറഹിമാന്‍ സിറ്റി, സഫീര്‍ നല്ലളം (അസി. കോഡിനേറ്റര്‍മാര്‍) എന്നിവര്‍ നയിക്കും. കൊടിമര ജാഥയ്ക്ക് ഫൈസല്‍ ഫൈസി മടവൂര്‍, ജലീല്‍ ദാരിമി നടുവണ്ണൂര്‍ (വൈസ് ക്യാപ്റ്റന്മാര്‍), നിസാം ഓമശ്ശേരി (ഡയറക്ടര്‍), ജിയാസ് (അസി .ഡയറക്ടര്‍), ഗഫൂര്‍ മുണ്ടുപാറ (കോഡിനേറ്റര്‍), ഖാദര്‍ തെയ്യപ്പാറ (അസി. കോഡിനേറ്റര്‍) എന്നിവര്‍ നേതൃത്വം നല്‍കും.