തൃശൂര്‍: തെരഞ്ഞെടുപ്പ് സുതാര്യമാക്കുന്നതിന്റെ ഭാഗമായി ഇലക്ഷന്‍ വോട്ടിങ് യന്ത്രവും വിവിപാറ്റും പരിചയപ്പെടുത്തുന്നതിന്റെ ഉദ്ഘാടനം ജില്ലാ പൊലിസ് മേധാവി (സിറ്റി) യതീഷ് ചന്ദ്ര നിര്‍വഹിച്ചു. കലക്ടറേറ്റില്‍ നടന്ന പരിശീലന പരിപാടിയില്‍ ജില്ലാ കലക്ടര്‍ ടി.വി അനുപമ അധ്യക്ഷയായി.
2019 ലെ ലോകസഭാ തെരഞ്ഞെടുപ്പ് രാജ്യമൊട്ടാകെ പൂര്‍ണമായും വിവിപാറ്റ് സംവിധാനം ഉപയോഗിച്ചുള്ളതായിരിക്കും. വോട്ട് ചെയ്യുന്ന വ്യക്തിക്ക് താന്‍ വോട്ട് രേഖപ്പെടുത്തിയത് ഏത് സ്ഥാനാര്‍ഥിക്കാണെന്ന് കണ്ടു ബോധ്യപ്പെടുന്നതിനുളള സംവിധാനമാണ് വിവിപാറ്റ് നല്‍കുന്നത്.
വോട്ട് ചെയ്യുമ്പോള്‍ വിവിപാറ്റിലെ ഡിസ്‌പ്ലേ സക്രീന്‍ വഴി വോട്ട് ലഭിക്കുന്ന സ്ഥാനാര്‍ഥിയുടെ ബാലറ്റ് പേപ്പറിലെ ക്രമനമ്പര്‍, പേര്, ചിഹ്നം എന്നിവ രേഖപ്പെടുത്തിയ ഒരു സ്ലിപ്പ് ഏഴ് സെക്കന്‍ഡ് സമയം വരെ കാണാനാവും.
ശേഷം ഈ സ്ലിപ്പ് ഈ യൂനിറ്റിലെ തന്നെ കംപാര്‍ട്ട്‌മെന്റിലേക്ക് നിക്ഷേപിക്കപ്പെടും. 2019 ലെ ലോക്‌സഭ തെരഞ്ഞെടുപ്പില്‍ വിവിപാറ്റ് രാജ്യത്താകമാനം ഉപയോഗിക്കും.  ഇതിനെത്തുടര്‍ന്ന് രാഷ്ട്രീയ പാര്‍ട്ടികള്‍ക്കും പൊതുജനങ്ങള്‍ക്കും ഈ സംവിധാനം പരിചയപ്പെടുത്തിന്നതിന് വിപുലമായ പരിപാടികള്‍ ആസൂത്രണം ചെയ്തതായി ജില്ലാ കലക്ടര്‍ അറിയിച്ചു.
തഹസില്‍ദാര്‍ കെ. കൃഷ്ണകുമാര്‍, ഡെപ്യൂട്ടി തഹസില്‍ദാര്‍ കെ. ജി പ്രാണ്‍സിങ് എന്നീ ഉദ്യോഗസ്ഥരുടെ നേതൃത്വത്തില്‍ കലക്ടറേറ്റ് കോണ്‍ഫറന്‍സ് ഹാളില്‍ പ്രായോഗിക പരിശീലനവും നടന്നു.