പുന്നയൂര്‍ക്കുളം: നാലു വയസുകാരിക്ക് ഡിഫ്ത്തീരിയ സ്ഥിരീകരിച്ചതിനെ തുടര്‍ന്ന് തീരമേഖലയില്‍ ആരോഗ്യ വകുപ്പിന്റെ പ്രതിരോധ പ്രവര്‍ത്തനം ആരംഭിച്ചു. ഞായറാഴ്ച്ചയും കുത്തിവെപ്പ് തുടരും.
പുന്നയൂര്‍ക്കുളം പഞ്ചായത്തിലെ മന്ദലാംകുന്ന് കിണറിനു പടിഞ്ഞാറ് ഭാഗത്ത് താമസിക്കുന്ന നാലുവയസുകാരിയാണ് ഡിഫ്ത്തീരിയ രോഗം ബാധിച്ച് തൃശൂര്‍ ഗവ. മെഡിക്കല്‍ കോളജില്‍ കഴിയുന്നത്. കഴിഞ്ഞ 31ന് പനി വന്നതിനെ തുടര്‍ന്ന് അണ്ടത്തോട് പ്രാഥമികാരോഗ്യ കേന്ദ്രത്തില്‍ ചികിത്സ തേടിയ കുട്ടിയെ പിന്നീട് പൊന്നാനി ഗവ. ആശുപത്രിയിലെ ഡോക്ടറേയും കാണിച്ചിരുന്നു. തുടര്‍ന്നാണ് തൃശൂര്‍ മെഡിക്കല്‍ കോളജ് ആശുപത്രിയിലേക്ക് അയച്ചത്.
പ്രഥാമിക പരിശോധനയില്‍ തന്നെ ഡിഫ്ത്തീരിയയാണെന്ന് സ്ഥിരീകരിച്ചതോടെയാണ് പുന്നയൂര്‍ പുന്നയൂര്‍ക്കുളം പഞ്ചായത്ത് അതിര്‍ത്തി പ്രദേശങ്ങളില്‍ പ്രതിരോധ പ്രവര്‍ത്തനം ആരംഭിച്ചത്. അസുഖം ബാധിച്ച കുട്ടിക്ക് നേരത്തെ പ്രതിരോധ കുത്തിവെപ്പ് എടുത്തിരുന്നില്ലെന്നാണ് ആരോഗ്യ വകുപ്പ് അധികൃതരുടെ വിശദീകരണം.
വാര്‍ഡ് അംഗം എ.എം അലാവുദ്ദീന്റെ നേതൃത്വത്തില്‍ ആരോഗ്യ വകുപ്പ് ഉദ്യോഗസ്ഥര്‍ മേഖലയില്‍ ബോധവല്‍ക്കരണവും നടത്തി. ഡോ. കെ.ടി. റഷീദ്. ഹെല്‍ത്ത് ഇന്‍സ്‌പെക്ടര്‍ സി.ആര്‍ ശിവപ്രസാദ്, ജൂനിയര്‍ ഹെല്‍ത്ത് ഇന്‍സ്‌പെക്ടര്‍ എന്‍.കെ പ്രദീപ്, സിനീഷ്, അക്ബറലി, ജൂനിയര്‍ പബ്ലിക് ഹെല്‍ത്ത് നഴ്‌സ് അജിതകുമാരി എന്നിവരുടെ നേതൃത്വത്തിലാണ് പ്രദേശത്ത് പ്രതിരോധ പ്രവര്‍ത്തനം നടത്തുന്നത്. നേരത്തെ കുത്തിവെപ്പ് നടത്താത്തവര്‍ ഞായറാഴ്ച്ച നടക്കുന്ന പ്രതിരോധ പ്രവര്‍ത്തനങ്ങളോട് സഹകരിക്കണമെന്ന് ഉദ്യോഗസ്ഥര്‍ അറിയിച്ചു.