പുതുക്കാട്: തൃക്കൂര്‍ മതിക്കുന്നില്‍ കാട്ടുപന്നിയിറങ്ങി വ്യാപകമായി കൃഷി നശിപ്പിച്ചു. തൃക്കൂര്‍ നെല്ലിശ്ശേരി അഖില്‍ വിജയന്റെ രണ്ട് ഏക്കര്‍ നെല്‍കൃഷിയും നെല്ലിശ്ശേരി ബൈജുവിന്റെ 25 നേന്ത്രവാഴകളും നശിപ്പിച്ചു. ഇരുപതിലേറെ പന്നികള്‍ കൂട്ടമായെത്തിയാണ് കൃഷി നശിപ്പിച്ചതെന്ന് കര്‍ഷകര്‍ പറയുന്നു. കതിരുവന്ന നെല്‍കൃഷി കുത്തിമറിച്ചിട്ട നിലയിലാണ്. ഒരു മാസത്തിനുള്ളില്‍ കൊയ്‌തെടുക്കാന്‍ കഴിയുന്ന നെല്‍കൃഷിയാണ് കാട്ടുപന്നികള്‍ നശിപ്പിച്ചത്.  വീണ്ടും പന്നികള്‍ ഇറങ്ങി കൃഷി നശിപ്പിക്കുമെന്ന ഭീതിയിലാണ് കര്‍ഷകര്‍.
മേഖലയില്‍ കാട്ടുപന്നി ശല്യം രൂക്ഷമാണെന്നും കൃഷിയിടങ്ങളിലേക്ക് പന്നികള്‍ എത്താതിരിക്കാന്‍ അധികൃതര്‍ നടപടിയെടുക്കണമെന്നും കര്‍ഷകര്‍ ആവശ്യപ്പെട്ടു.