സ്വന്തം ലേഖകന്‍
തിരുവനന്തപുരം: സംസ്ഥാനത്ത് പ്ലാസ്റ്റിക് നിരോധനവുമായി ബന്ധപ്പെട്ട അവ്യക്തതകള്‍ തീരുന്നില്ല.
ഇന്നലെ മുതല്‍ പിഴയീടാക്കിത്തുടങ്ങുമെന്നായിരുന്നു സര്‍ക്കാര്‍ പ്രഖ്യാപനമെങ്കിലും വിവിധ വകുപ്പുകള്‍ സംയുക്തമായി നടത്തേണ്ട പരിശോധനയില്‍ വ്യക്തത വരാത്തതിനാല്‍ പൂര്‍ണമായും പിഴയീടാക്കാന്‍ തുടങ്ങിയിട്ടില്ല.
മലിനീകരണ നിയന്ത്രണ ബോര്‍ഡും ആരോഗ്യ, തദ്ദേശ വകുപ്പും സംയുക്തമായാണ് പരിശോധനകള്‍ നടത്തേണ്ടത്. എന്നാല്‍ സര്‍ക്കാര്‍ വ്യക്തമായ മാര്‍ഗ നിര്‍ദേശം നല്‍കാത്തതിനാല്‍ ഇവരാരും പിഴയീടാക്കി തുടങ്ങിയിട്ടില്ല.
പരിശോധനയും മറ്റ് നടപടികളും സംബന്ധിച്ച് വ്യക്തത വരുത്തണമെന്ന് മലിനീകരണ നിയന്ത്രണ ബോര്‍ഡ് സര്‍ക്കാരിന് കത്ത് നല്‍കിയിട്ടും ഇതുവരെ മറുപടിയും ലഭിച്ചിട്ടില്ല.
ഇതോടെ പ്ലാസ്റ്റിക് പിടിച്ചെടുക്കാനോ പിഴയീടാക്കാനോ തല്‍ക്കാലം ആലോചിക്കുന്നില്ലെന്നാണ് ഉദ്യോഗസ്ഥരുടെ നിലപാട്.ജില്ലാ ഭരണകൂടവും തദ്ദേശ വകുപ്പ് ഉദ്യോഗസ്ഥരും നടപടി ഉണ്ടാകുമെന്നു പറയുന്നതല്ലാതെ എങ്ങനെ നടപ്പാക്കും എന്നത് സംബന്ധിച്ച് ഇവര്‍ക്കും വ്യക്തതയില്ല.
ഒറ്റത്തവണ ഉപയോഗിക്കാവുന്ന പ്ലാസ്റ്റിക് വസ്തുക്കളുടെ നിരോധനം പുതുവര്‍ഷം മുതല്‍ പ്രാബല്യത്തിലായെങ്കിലും പിഴ ഈടാക്കുന്നത് 15 മുതലെന്നായിരുന്നു സര്‍ക്കാര്‍ പ്രഖ്യാപനം.
10000 രൂപ മുതല്‍ 50000 രൂപ വരെയാണ് പിഴയായി നിശ്ചയിച്ചിരിക്കുന്നത്.