പയ്യന്നൂര്‍: ചെറുതാഴത്ത് ആര്‍.എസ്.എസ് കാര്യാലയം തീവച്ച് നശിപ്പിച്ചു. ചെറുതാഴം ശ്രീ രാഘവപുരം ക്ഷേത്രത്തിനു (ഹനുമരമ്പലം) സമീപത്തെ വിവേകാനന്ദ സേവാ കേന്ദ്രത്തിനാണ് ഇന്നലെ പുലര്‍ച്ചെ 2.30 ഓടെ പെട്രോള്‍ ഒഴിച്ച് തീവച്ചത്.
പത്തു വര്‍ഷത്തോളമായി ആര്‍.എസ്.എസ് പരിപാടികളും മറ്റും നടത്തുന്ന ഇവിടെ യോഗ പരിശീലനവും നടത്താറുണ്ടായിരുന്നു. ആര്‍.എസ്.എസ്, ബി.ജെ.പി അനുഭാവികളല്ലാത്തവരും ഇവിടെ യോഗ പരിശീലനത്തിന് എത്താറുണ്ടെന്നു ഭാരവാഹികള്‍ പറഞ്ഞു. കോണ്‍ഗ്രീറ്റ് കെട്ടിടത്തിന്റെ ജനല്‍ കുത്തിത്തുറന്ന് ഹാളിലേക്കു പെട്രോള്‍ ഒഴിച്ചു തീവയ്ക്കുകയായിരുന്നു.
കസേര, മേശ, ടെലിവിഷന്‍, കൊടി തോരണങ്ങള്‍, നേതാക്കളുടെ ഫോട്ടോകള്‍, ഫയലുകള്‍ തുടങ്ങിയവ പൂര്‍ണമായും കത്തിനശിച്ചു. പിന്നില്‍ സി.പി.എം പ്രവര്‍ത്തകരാണെന്ന് ആര്‍.എസ്.എസ് ആരോപിച്ചു.