കാസര്‍കോട്: തുളുനാട് കബഡി അക്കാദമിയുടെ നേതൃത്വത്തില്‍ ഏപ്രില്‍ 2 മുതല്‍ 6 വരെ നടക്കുന്ന ഓള്‍ ഇന്ത്യാ എ ഗ്രേഡ് കബഡി ടൂര്‍ണമെന്റിന്റെ ലോഗോ കെ കുഞ്ഞിരാമന്‍ എം.എല്‍.എ പ്രകാശനം ചെയ്തു. കാസര്‍കോട് പ്രസ് ക്ലബില്‍ നടന്ന പരിപാടിയില്‍ പ്രസ് ക്ലബ് പ്രസിഡന്റ് സണ്ണി ജോസഫ് അധ്യക്ഷനായി. ശില്‍പി ശ്രീശയന്‍ അഡൂര്‍ ആണ് ലോഗോ രൂപ കല്‍പന ചെയ്തത്.
ആദ്യമായാണ് ജില്ലയില്‍ അന്തരാഷ്ട്ര നിലവാരമുള്ള കബഡി ടൂര്‍ണ്ണമെന്റ് അരങ്ങേറുന്നതെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. കബഡിയെ ജനപ്രിയമാക്കിയ പ്രോ കബഡി ലീഗിലെ താരങ്ങളും ദേശിയ-സംസ്ഥാന ടീമംഗങ്ങളും അണിനിരക്കുന്ന ടൂര്‍ണമെന്റില്‍ രാജ്യത്തെ പത്തോളം മുന്‍നിര ടീമുകള്‍ പങ്കെടുക്കും.
മുള്ളേരിയ, പൂവടുക്കയിലുള്ള പഞ്ചായത്ത് സ്റ്റേഡിയത്തില്‍ പ്രത്യേകം തയ്യാറാക്കിയ ഗ്രൗണ്ടിലാണ് ടൂര്‍ണ്ണമെന്റ് നടക്കുന്നത്.
മത്സരങ്ങള്‍ക്കായി 5000 ആളുകളെ ഉള്‍ക്കൊള്ളുന്ന ഗ്യാലറിയാണ് തയ്യാറാക്കുന്നത്. വാര്‍ത്തസമ്മേളനത്തില്‍ കണ്‍വീനര്‍ ഇ ഭാസ്‌കരന്‍, സിജിമാത്യു, കെ നാസര്‍, കെ.വി നവീന്‍ കുമാര്‍, കെ ശങ്കരന്‍ സംബന്ധിച്ചു.