ചങ്ങനാശ്ശേരി: സംസ്ഥാനത്ത് നടന്ന ആക്രമങ്ങള്‍ക്കും കലാപങ്ങള്‍ക്കും കാരണം സര്‍ക്കാര്‍ തന്നെയെന്ന് എന്‍.എസ്.എസ് ജനറല്‍ സെക്രട്ടറി ജി.സുകുമാരന്‍ നായര്‍. നവോത്ഥാനത്തിന്റെ പേര് പറഞ്ഞ് സര്‍ക്കാര്‍ നിരീശ്വരവാദം നടപ്പാക്കുകയാണ്.

നവോത്ഥാനത്തിന്റെ പേരില്‍ നിരീശ്വരവാദം നടപ്പാക്കാനുള്ള ആസൂത്രിത നീക്കമാണ് സര്‍ക്കാരിന്റെ ഭാഗത്ത് നിന്നും നടന്നുവരുന്നത്. ജനങ്ങള്‍ നല്‍കിയ അധികാരം കൈയില്‍വച്ചുകൊണ്ട് ഏത് ഹീനമാര്‍ഗവും ഉപയോഗിച്ച് പാര്‍ട്ടിയുടെ നയം നടപ്പാക്കുക എന്നതാണ് ലക്ഷ്യമെന്ന് സംശയിക്കുന്നതില്‍ തെറ്റു പറയാനാകില്ലെന്നും സുകുമാരന്‍ നായര്‍ പ്രസ്താവനയില്‍ പറയുന്നു.

മതമേതായാലും വിശ്വാസം സംരക്ഷിക്കേണ്ടതാണ്.മനുഷ്യരാശിയുടെ നിലനില്‍പ്പിന് ഇതാവശ്യമാണ്. നിലവിലുള്ള ആചാരാനുഷ്ഠാനങ്ങള്‍ സംരക്ഷിച്ച് ഈശ്വര വിശ്വാസം നിലനിര്‍ത്തേണ്ടത് വിശ്വാസികളുടെ ആവശ്യമാണ്. അത് സംരക്ഷിക്കേണ്ട ബാധ്യത സര്‍ക്കാരിനുണ്ട്. സര്‍ക്കാര്‍ അത് ചെയ്തില്ലെങ്കില്‍ ജനങ്ങള്‍ അത് നിറവേറ്റാന്‍ രംഗത്തിറങ്ങുന്നതില്‍ തെറ്റ് പറയാനാകുമോ എന്ന് ജി.സുകുമാരന്‍ നായര്‍ ചോദിക്കുന്നു. ഇതിനെ രാഷ്ട്രീയം നിറം നല്‍കി പ്രതിരോധിക്കുന്നത് ശരിയല്ലെന്നും അദ്ദേഹം പറഞ്ഞു.