കല്‍പ്പറ്റ: പരമ്പരാഗത കൃഷി വികാസ് പദ്ധതിയില്‍ വയനാട്ടില്‍ 41 ക്ലസ്റ്ററുകള്‍ ഉള്‍പ്പെടുത്തിയതായി ജില്ലാ പ്രിന്‍സിപ്പല്‍ കൃഷി ഓഫിസര്‍ ഷാജി അലക്‌സാണ്ടര്‍ അറിയിച്ചു. വിവിധ ബ്ലോക്കുകളിലായി കാപ്പിയുടെ 21-ഉം സുഗന്ധനെല്ലിനങ്ങളുടെ 20-ഉം പയര്‍ വര്‍ഗങ്ങളുടെ ഒന്നും ക്ലസ്റ്ററുകളാണ് ഉള്‍പ്പെടുത്തിയത്. 50 ഏക്കര്‍ വരുന്നതാണ് ഓരോ ക്ലസ്റ്ററും. 41 ക്ലസ്റ്ററുകളിലുമായി രണ്ടായിരത്തില്‍പരം കര്‍ഷകര്‍ക്ക് പദ്ധതിയുടെ ഗുണം ലഭിക്കും. വിവിധ ഘട്ടങ്ങളിലായി ഓരോ ക്ലസ്റ്ററിനും ഏകദേശം 14 ലക്ഷം രൂപയുടെ ആനുകൂല്യം കിട്ടും. പഞ്ചായത്തുകളാണ് ക്ലസ്റ്ററുകളുടെ തെരഞ്ഞെടുപ്പ് നടത്തിയത്. കാലവര്‍ഷത്തില്‍ കൃഷി നശിച്ചവര്‍ക്ക് നഷ്ടപരിഹാരം നല്‍കുന്നതിന് 10 കോടി രൂപകൂടി ലഭിക്കുന്നതിന് അപേക്ഷ നല്‍കിട്ടുണ്ട്. കൃഷിക്കാര്‍ക്ക് വിതരണം ചെയ്യുന്നതിന് 17 കോടി രൂപയാണ് സമീപകാലത്തു ലഭിച്ചത്. ഇതില്‍ ഏകദേശം എട്ടു കോടി രൂപ പ്രളയത്തില്‍ വിളനാശം നേരിട്ടവര്‍ക്ക് നില്‍കി. കുടിശിക വിതരണത്തിനാണ് ബാക്കി വിനിയോഗിച്ചത്. ഫണ്ട് ലഭിക്കുന്ന മുറയ്ക്ക് മുഴുവന്‍ കൃഷിക്കാര്‍ക്കും നഷ്ടപരിഹാരം നല്‍കും. പെരുമഴമൂലം ഉണ്ടായ അടയ്ക്ക ഉല്‍പാദനത്തകര്‍ച്ചയ്ക്ക് നിലവിലെ മാനദണ്ഡപ്രകാരം നഷ്ടപരിഹാരം അനുവദിക്കാനാകില്ലെന്നും ഓഫിസര്‍ പറഞ്ഞു.