അങ്ങാടിപ്പുറം: റെയില്‍വേ സ്റ്റേഷന്‍ പരിസരത്തു യാത്രക്കാര്‍ക്ക് തണലേകിയിരുന്ന ആല്‍മരങ്ങള്‍ ഭീഷണിയായതോടെ വെട്ടിമാറ്റിത്തുടങ്ങി. അങ്ങാടിപ്പുറം റെയില്‍വേ സ്റ്റേഷനിലെ ഒന്നാം നമ്പര്‍ പ്ലാറ്റ്‌ഫോമിലാണ് അഞ്ചോളം ആല്‍മരങ്ങള്‍ തണലായി നില്‍ക്കുന്നത്.
എന്നാല്‍, ആഴ്ചകള്‍ക്ക് മുന്‍പു സ്റ്റേഷന്‍ മാസ്റ്ററുടെ ഓഫിസിനു മുന്നിലുള്ള ആല്‍മരം കടപുഴകി വീണതോടെ നൂറു മീറ്റര്‍ അകലെയുള്ള മറ്റൊരു ആല്‍മരവും കടപുഴകി വീഴാന്‍ തുടങ്ങി. മുകള്‍ ഭാഗത്തു വലിയ ശിഖരങ്ങളും താഴെ ഭാഗത്ത് ദ്രവിച്ച നിലയിലുമായിട്ടാണ് ഈ ആല്‍മരം സ്ഥിതിചെയ്തിരുന്നത്. യാത്രക്കാര്‍ പരാതി പറഞ്ഞതിനെ തുടര്‍ന്ന് റെയില്‍വേ അധികൃതര്‍ കഴിഞ്ഞ ദിവസം അപകട ഭീഷണിയായ ആല്‍മരം മുറിച്ചുനീക്കുകയും ചെയ്യുകയായിരുന്നു.
വര്‍ഷങ്ങള്‍ക്കു മുന്‍പു ട്രെയിന്‍ യാത്രികയായ സ്ത്രീയുടെ ദേഹത്തേക്കു മരം പൊട്ടിവീണ് സ്ത്രീ മരണപ്പെട്ടിരുന്നു.