ജിദ്ദ: സഊദി എണ്ണയുല്‍പാദനത്തില്‍ കുറവു വരുത്തി. കഴിഞ്ഞ വര്‍ഷം 4.9 ശതമാനം കുറവ് വരുത്തിയതായി ഊര്‍ജ മന്ത്രാലയത്തിന്റെയും ഒപെക്കിന്റെയും കണക്കുകള്‍ വ്യക്തമാക്കുന്നു. 2019 ല്‍ സഊദിയുടെ ശരാശരി പ്രതിദിന എണ്ണയുല്‍പാദനം 9.81 ദശലക്ഷം ബാരലായിരുന്നു. 2018 ല്‍ ഇത് 10.32 ദശലക്ഷം ബാരലായിരുന്നു. സഊദിയുടെ കഴിഞ്ഞ വര്‍ഷത്തെ എണ്ണയുല്‍പാദനം ആറു വര്‍ഷത്തിനിടയിലെ ഏറ്റവും കുറഞ്ഞ തോതാണ്. ഇതിനു മുമ്പ് 2014 ലാണ് എണ്ണയുല്‍പാദനം ഇത്രയും കുറഞ്ഞത്. ആ വര്‍ഷം പ്രതിദിന എണ്ണയുല്‍പാദനം 9.71 ദശലക്ഷം ബാരലായിരുന്നു. 2010 മുതല്‍ സഊദി തുടര്‍ച്ചയായി എണ്ണയുല്‍പാദനം വര്‍ധിപ്പിച്ചു വരികയായിരുന്നു. 2013 ലും 2017 ലും 2019 ലും മാത്രമാണ് തൊട്ടു മുന്‍ വര്‍ഷങ്ങളെ അപേക്ഷിച്ച് ഉല്‍പാദനത്തില്‍ കുറവ് വരുത്തിയത്.

2010 ല്‍ 8.17 ദശലക്ഷവും 2011 ല്‍ 9.31 ദശലക്ഷവും 2012 ല്‍ 9.76 ദശലക്ഷവും 2013 ല്‍ 9.64 ദശലക്ഷവും 2014 ല്‍ 9.71 ദശലക്ഷവും 2015 ല്‍ 10.19 ദശലക്ഷവും 2016 ല്‍ 10.46 ദശലക്ഷവും 2017 ല്‍ 9.96 ദശലക്ഷവും 2018 ല്‍ 10.32 ദശലക്ഷവും 2019 ല്‍ 9.81 ദശലക്ഷവും ബാരലായിരുന്നു സഊദിയുടെ ശരാശരി പ്രതിദിന എണ്ണയുല്‍പാദനം. ആഗോള വിപണിയില്‍ വിലയിടിച്ചില്‍ തടയുന്നതിന് ഉല്‍പാദനം കുറക്കുന്നതിന് പെട്രോളിയം ഉല്‍പാദക രാജ്യങ്ങളുടെ കൂട്ടായ്മയായ ഒപെക്കും സംഘടനക്ക് പുറത്തുള്ള റഷ്യ അടക്കമുള്ള സ്വതന്ത്ര ഉല്‍പാദകരും തമ്മിലുണ്ടാക്കിയ (ഒപെക് പ്ലസ്) കരാര്‍ പാലിച്ചതിന്റെ ഫലമായാണ് കഴിഞ്ഞ വര്‍ഷം സഊദിയുടെ എണ്ണയുല്‍പാദനം കുറഞ്ഞത്. ഒപെക് പ്ലസ് കരാര്‍ 2019 ല്‍ പ്രതിദിന ഉല്‍പാദനത്തില്‍ 12 ലക്ഷം ബാരലിന്റെ വീതം കുറവാണ് വരുത്തിയത്. ഈ വര്‍ഷം ആദ്യ പാദാവസാനം വരെയുള്ള കാലത്ത് പ്രതിദിന ഉല്‍പാദനത്തില്‍ 17 ലക്ഷം ബാരലിന്റെ വീതം കുറവ് വരുത്തുന്നതിന് ഒപെക് പ്ലസ് അടുത്തിടെ ധാരണയിലെത്തിയിരുന്നു. എണ്ണ വിപണിയില്‍ സ്ഥിരതയുണ്ടാക്കുന്നതിന് സാധാരണയില്‍ ധാരണ പ്രകാരമുള്ളതില്‍ കൂടുതലായി ഉല്‍പാദനം കുറക്കുന്നത് സഊദിയുടെ പതിവാണ്.
കഴിഞ്ഞ വര്‍ഷം ഒപെക് രാജ്യങ്ങളുടെ എണ്ണയുല്‍പാദനം 6.3 ശതമാനം തോതില്‍ കുറഞ്ഞതായാണ് കണക്ക്. പ്രതിദിന ഉല്‍പാദനത്തില്‍ 20 ലക്ഷത്തോളം ബാരലിന്റെ കുറവാണ് ഒപെക് രാജ്യങ്ങള്‍ വരുത്തിയത്.