മാഡ്രിഡ്: ലാലിഗയില്‍ ബാഴ്‌സലോണയുടെ കുതിപ്പും റയല്‍ മാഡ്രിഡിന്റെ കിതപ്പും തുടരുന്നു. ബാഴ്‌സ ഗെറ്റാഫയെ ഒന്നിനെതിരേ രണ്ട് ഗോളുകള്‍ക്ക് പരാജയപ്പെടുത്തിയപ്പോള്‍ റയല്‍ 2-0ത്തിന് റയല്‍ സോസിഡാഡിന് മുന്നില്‍ കീഴടങ്ങി.
ലീഗില്‍ ഒന്നാംസ്ഥാനത്ത് തുടരുന്ന ബാഴ്‌സലോണ ഇന്നലെ ഗെറ്റാഫക്കെതിരേ മികച്ച പ്രകടനമാണ് പുറത്തെടുത്തത്. മത്സരത്തിലെ മുഴുവന്‍ ഗോളുകളും പിറന്നത് ആദ്യ പകുതിയിലാണ്. ലയണല്‍ മെസ്സി (20ാം മിനുട്ട്), ലൂയിസ് സുവാരസ് (39) എന്നിവര്‍ ബാഴ്‌സക്കുവേണ്ടി വല ചലിപ്പിച്ചു.
43ാം മിനുട്ടില്‍ ജെയ്മി മാട്ടയാണ് ഗെറ്റാഫയുടെ ആശ്വാസ ഗോള്‍ നേടിയത്. ഇന്നലെ ഗോള്‍ നേടിയതോടെ മെസ്സി മറ്റൊരു അപൂര്‍വ നേട്ടത്തിനടുത്തെത്തി. ഇനി ഒരു ഗോള്‍കൂടി നേടുന്നതോടെ 400 ലീഗ് ഗോളുകള്‍ നേടുന്ന താരമെന്ന റെക്കോര്‍ഡ് മെസ്സിയുടെ കാല്‍ക്കീഴിലാവും. നിലവില്‍ 434 മത്സരങ്ങളില്‍നിന്ന് 399 ഗോളുകളാണ് മെസ്സി നേടിയത്.
ഈ സീസണില്‍ യുവന്റസിലേക്ക് ചേക്കേറിയ പോര്‍ച്ചുഗല്‍ താരം ക്രിസ്റ്റിയാനോ റൊണാള്‍ഡോയാണ് ലാലിഗയില്‍ മെസ്സിക്ക് പിറകിലുള്ളത്.
292 മത്സരങ്ങളില്‍നിന്ന് 311 ഗോളുകളാണ് റൊണാള്‍ഡോയുടെ സമ്പാദ്യം.
റയല്‍ സ്വന്തം തട്ടകത്തില്‍ റയല്‍ സോസിഡാഡിന് മുന്നില്‍ പരാജയപ്പെട്ടാണ് ഇന്നലെ കളംവിട്ടത്. രണ്ട് ഗോളുകള്‍ക്കാണ് റയലിന്റെ തോല്‍വി. മത്സരത്തില്‍ 60 ശതമാനം പന്ത് വയ്ക്കാന്‍ സാധിച്ചെങ്കിലും അത് എതിരാളികളുടെ വലയിലെത്തിക്കാനായില്ല.
റയല്‍ മാഡ്രിഡ് ഗോളിലേക്ക് എട്ടു ഷോട്ടുകള്‍ തൊടുത്തെങ്കിലും ഒന്നും ഗോളായില്ല. മത്സരത്തിന്റെ 61ാം മിനുട്ടില്‍ ലൂക്കാസ് വാസ്‌ക്വസ് ചുവപ്പ് കാര്‍ഡ് കണ്ട് പുറത്തുപോയതും റയലിന് തിരിച്ചടിയായി. മൂന്നാം മിനുട്ടില്‍ തന്നെ റയല്‍ സോസിഡാഡ് റയല്‍ മാഡ്രിഡിന്റെ വലകുലുക്കിയിരുന്നു. വില്യം ജോസാണ് പെനാല്‍റ്റിയിലൂടെ സോസിഡാഡിന് വേണ്ടി ഗോള്‍ നേടിയത്.
83ാം മിനുട്ടില്‍ റൂബന്‍ പാര്‍ഡോയിലൂടെ സോസിഡാഡ് റയലിന്റെ പതനം പൂര്‍ത്തിയാക്കി. ലീഗില്‍ അഞ്ചാം സ്ഥാനത്തുള്ള റയല്‍ മാഡ്രിഡിന് സീസണ്‍ ചാംപ്യന്മാരാകണമെങ്കില്‍ മിന്നുംപ്രകടനം പുറത്തെടുക്കേണ്ടിവരും. മറ്റൊരു മത്സരത്തില്‍ സെവിയ്യയും അത്‌ലറ്റികോ മാഡ്രിഡും 1-1 എന്ന നിലയില്‍ പിരിഞ്ഞു.