തിരുവനന്തപുരം: ക്രിസ്തുമസ്, പുതുവത്സര സീസണില്‍ സംസ്ഥാനത്ത് റെക്കോര്‍ഡ് മദ്യ വില്‍പന. ഇക്കാലയളവിലെ 10 ദിവസം കൊണ്ട് കേരളം കുടിച്ചത് 514.34 കോടി രൂപയുടെ മദ്യം. കഴിഞ്ഞ വര്‍ഷം ഈ കാലവയളവില്‍ ഇത് 480.67 കോടി ആയിരുന്നു. ക്രിസ്തുമസിന്റെ തലേദിവസം 64.63 കോടി രൂപയുടെ മദ്യമാണ് ബിവറേജസ് കോര്‍പറേഷന്‍ വിറ്റത്. മുന്‍ വര്‍ഷം ഇത് 49.2 കോടി ആയിരുന്നു. പുതുവത്സരാഘോഷവും മദ്യത്തില്‍ മുങ്ങി. ഡിസംബര്‍ 31ന് 78.77 കോടിയുടെ മദ്യം വിറ്റപ്പോള്‍ മുന്‍വര്‍ഷത്തെ 61.7 കോടിയുടെ റെക്കോഡ് പഴങ്കഥയായി. ക്രിസ്തുമസ് തലേന്ന് നെടുമ്പാശേരിയിലെ ഔട്ട്‌ലെറ്റിലാണ് ഏറ്റവുമധികം വില്‍പ്പന നടന്നത്. ഇവിടെ 51.3 ലക്ഷം രൂപയുടെ മദ്യമാണ് വിറ്റത്.
പുതുവര്‍ഷത്തലേന്ന് പാലാരിവട്ടത്തെ ഔട്ട്‌ലെറ്റ് വില്‍പനയില്‍ മുന്നിലെത്തി. 73.53 ലക്ഷം രൂപയുടെ മദ്യമാണ് ഈ കൗണ്ടറില്‍ മാത്രം വിറ്റത്. വിദേശ നിര്‍മിത മദ്യം ബിവറേജസ് കോര്‍പറേഷന്‍ എത്തിച്ചിരുന്നുവെങ്കിലും കാര്യമായ വില്‍പനയുണ്ടായില്ലെന്ന് അധികൃതര്‍ പറഞ്ഞു.