നെടുമ്പാശ്ശേരി: അത്താണി മാഞ്ഞാലി റോഡിലെ അപകട വളവ് വീണ്ടും അപകടകെണിയൊരുക്കുന്നു. ചെങ്ങമനാട് സെന്റ് ആന്റണീസ് പള്ളിക്ക് സമീപം തെയ്ക്കാനത്ത് ഗ്യാസ് ഏജന്‍സിക്ക് മുന്നിലുള്ള വളവാണ് വീണ്ടും അപകട വളവായി മാറുന്നത്.
എതിര്‍ദിശയില്‍ നിന്നും വരുന്ന വാഹനങ്ങളെ കൃത്യമായി കാണാന്‍ കഴിയാത്തതും റോഡിലെ കുഴിയുമാണ് ഈ ഭാഗത്ത് നിരന്തരമായി വാഹനങ്ങള്‍ അപകടത്തില്‍പെടാന്‍ ഇടയാക്കിയിരുന്നത്.
ഗട്ടര്‍ കണ്ട് പെട്ടെന്ന് ബ്രെയ്ക്ക് ചെയ്ത ലോറിയുടെ പിന്നില്‍ ഇരു ചക്രവാഹനം ഇടിച്ച് റോഡിലേക്ക് തെറിച്ചു വീണ ഇരുചക്ര വാഹനത്തിലെ യാത്രക്കാരന്‍ എതിരെ നിന്നും വരികയായിരുന്ന ബസിനടിയില്‌പെട്ട് ഏതാനും മാസങ്ങള്‍ക്ക് മുന്‍പ് ഇവിടെ ദാരുണമായി മരണമടഞ്ഞിരുന്നു. മഴ ആരംഭിക്കുന്നതോടെ ഈ ഭാഗത്ത് രൂപപ്പെടുന്ന വെള്ളക്കെട്ടാണ് റോഡ് തകരാറിലാകാന്‍ ഇടയാക്കുന്നത്. ഇരുചക്രവാഹനങ്ങളടക്കം നിരവധി വാഹങ്ങളാണ് ഇവിടെ അപകടത്തിനിരയായിരിക്കുന്നത്.
നാട്ടുകാര്‍ നിരന്തരം ആവശ്യം ഉന്നയിച്ചിട്ടും ഈ ഭാഗത്തെ അപകടം ഒഴിവാക്കാന്‍ ബന്ധപ്പെട്ട പൊതുമരാമത്ത് ഉദ്യോഗസ്ഥര്‍ യാതൊരു നടപടിയും സ്വീകരിച്ചിരുന്നില്ല. പിന്നീട് നാട്ടുകാര്‍ തന്നെ സഹകരിച്ച് ഇവിടെ രൂപപ്പെട്ടിരുന്ന മൂന്ന് കുഴികള്‍ കോണ്‍ക്രീറ്റ് ചെയ്ത് അടയ്ക്കുകയായിരുന്നു. മഴ ശക്തമായതോടെ വീണ്ടും വെള്ളക്കെട്ട് രൂപപ്പെടുകയും കോണ്‍ക്രീറ്റ് ഇളകി കുഴികള്‍ രൂപപ്പെട്ടതാണ് വീണ്ടും അപകടക്കെണിയൊരുക്കാന്‍ ഇടയാക്കിയത്.
വലിയ വാഹനങ്ങള്‍ ഗട്ടര്‍ ഒഴിവാക്കി മറുവശത്ത് കൂടി പോകുന്നതോടെ വീതികുറഞ്ഞ റോഡിന്റെ എതിര്‍ വശത്ത് നിന്നും വരുന്ന വാഹനങ്ങള്‍ക്ക് കടന്നുപോകാന്‍ കഴിയാതെ വരുന്നു. പലപ്പോഴും പെട്ടെന്നാണ് എതിരെ വരുന്ന വാഹനങ്ങള്‍ ശ്രദ്ധയില്‍പ്പെടുന്നത്. അത്താണി ഭാഗത്ത് നിന്നും വരുന്ന വാഹനങ്ങള്‍ വെള്ളവും കുഴിയും കണ്ട് പെട്ടെന്ന് ബ്രെയ്ക്ക് ചെയ്യുന്നത് മൂലം പലപ്പോഴും തലനാരിഴക്കാണ് വന്‍ അപകടങ്ങള്‍ ഒഴിവാകുന്നത്.
കഴിഞ്ഞ ദിവസം ഇതു വഴി വന്ന ഇരു ചക്രവാഹനത്തിലെ യാത്രക്കാരനായിരുന്ന മദ്‌റസാ അധ്യാപകന്‍ ഇവിടെ അപകടത്തില്‍പെട്ടിരുന്നു. ആ സമയത്ത് ഇതു വഴി മറ്റ് വാഹനങ്ങള്‍ വരാതിരുന്നത്‌കൊണ്ട് മാത്രം കൂടുതല്‍ അപകടം ഒഴിവാകുകയായിരുന്നു. പറവൂര്‍, കൊടുങ്ങല്ലൂര്‍ ഭാഗത്ത് നിന്നും നെടുമ്പാശ്ശേരി അന്താരാഷ്ട്ര വിമാനത്താവളത്തിലേക്കുള്ള പ്രധാന റോഡാണ് ഇത്.
ദിനംപ്രതി നൂറുകണക്കിന് വാഹനങ്ങളാണ് ഇതുവഴി കടന്നുപോകുന്നത്. അപകടങ്ങള്‍ തുടര്‍ക്കഥയാകുമ്പോഴും പരിഹാരം കാണാന്‍ അധികൃതരുടെ കണ്ണുതുറക്കുന്നില്ല.മനുഷ്യ ജീവനുപോലും വിലകല്‍പ്പിക്കാതെ അടുത്ത അപകടത്തിനായി കാത്തുനില്‍ക്കുകയാണ് ബന്ധപ്പെട്ട അധികാരികള്‍.