പോര്‍ട്ട് എലിസബത്ത്: ഐ.സി.സിയുടെ മികച്ച താരത്തിനുള്ള പ ുരസ്‌കാര നേട്ടം സെഞ്ചുറിയിലൂടെ ആഘോഷിച്ച ബെന്‍ സ്റ്റോക്‌സിന്റെയും യുവ താരം ഒലിപോപിന്റെയും മികവില്‍ ദക്ഷിണാഫ്രിക്കക്കെതിരായ മൂന്നാം ക്രിക്കറ്റ് ടെസ്റ്റില്‍ ഇംഗ്ലണ്ടിന് മികച്ച സ്‌കോര്‍. ഒന്നാം ഇന്നിങ്‌സ് ഒന്‍പതിന് 499 എന്ന നിലയില്‍ സന്ദര്‍ശകര്‍ ഡിക്ലയര്‍ ചെയ്തു. 

നാലിന് 224 റണ്‍സ് എന്ന നിലയില്‍ രണ്ടാം ദിനം കളിയാരംഭിച്ച ഇംഗ്ലണ്ട് സ്റ്റോക്‌സിന്റെയും പോപിന്റെയും കരുത്തില്‍ ഭേദപ്പെട്ട സ്‌കോറിലേക്ക് കുതിക്കുകയായിരുന്നു.  148ന് 4 എന്ന നിലയില്‍ ഒത്തു ചേര്‍ന്ന ഇരുവരും ചേര്‍ന്ന് അഞ്ചാം വിക്കറ്റില്‍ 203 റണ്‍സിന്റെ കൂട്ടുകെട്ടാണ് പടുത്തുയര്‍ത്തിയത്.  പോപ് പുറത്താകാതെ 135 റണ്‍സും സ്റ്റോക്‌സ്  120  റണ്‍സുമാണെടുത്തത്.  

23 പന്തില്‍ 42 റണ്‍സെടുത്ത് വാലറ്റത്ത് തകര്‍ത്തടിച്ച മാര്‍ക് വുഡാണ് ഇംഗ്ലണ്ടിന്റ സ്‌കോര്‍ അഞ്ഞൂറിനരികിലെത്തിച്ചത്. ഇവര്‍ക്ക് പുറമെ സാക് ക്രാവ്‌ലി (44) സാം കറന്‍ (44)  എന്നിവരാണ് ഇംഗ്ലണ്ടിന്റെ പ്രധാന സ്‌കോറര്‍മാര്‍. ദക്ഷിണാഫ്രിക്കക്കായി കേശവ് മഹാരാജ് അഞ്ച് വിക്കറ്റ് നേടി. റബാഡക്ക് രണ്ടും നോര്‍ട്‌ജെ, ഡാനി പീറ്റേഴ്‌സണ്‍ എന്നിവര്‍ക്ക് ഓരോ വിക്കറ്റ് വീതവും ലഭിച്ചു.