ആലുവ: കുട്ടമശ്ശേരി ജനതയുടെ കൂട്ടായ്മ ഒരുക്കിയ ജൈവ അരി വിപണിയിലിറക്കി.രണ്ടരപ്പതിറ്റാണ്ടോളം തരിശ്ശു കിടന്ന കുണ്ടോപ്പാടം, ചങ്ങം മത, തണങ്ങാട് എന്നീ പാടശേഖരങ്ങളില്‍ പ്പെട്ട 30 ഏക്കറിലാണു കൃഷിയിറക്കിയത്. കീഴ്മാട് പഞ്ചായത്ത്, കുട്ടമശ്ശേരി സര്‍വ്വീസ് സഹകരണ ബാങ്ക്, കൃഷി ഭവന്‍, ജാവേദ് ഹസ്സന്‍ ഫൗണ്ടേഷന്‍ എന്നിവയുടെ സഹകരണത്തോടെ കുട്ടമശ്ശേരി പാടശേഖര സമിതിയാണു കൃഷി നടത്തിയത്. 'കുട്ടമശ്ശേരി കുത്തരി: എന്നപേരിലാണു അരി വിപണിയില്‍ എത്തിക്കുന്നത്. അഞ്ച്, പത്ത് കിലോഗ്രാമിന്റെ പായ്ക്കറ്റുകളാണു വില്‍ പ്പനയ്ക്കുള്ളത്. കുട്ടമശ്ശേരി സഹകരണ ബാങ്കിന്റെ സ്റ്റേര്‍ വഴിയാണു വില്‍പന നടത്തുന്നത്.
ചലച്ചിത്രതാരം സിദ്ധീഖ് അരി വിപണിയിലിറക്കി. കീഴ്മാട് പഞ്ചായത്ത് പ്രസിഡന്റ് കെ.എ. രമേശ് സമ്മേളനം ഉദ്ഘാടനം ചെയ്തു. പാടശേഖര സമിതി പ്രസിഡന്റ് വി.വി. മന്മഥന്‍ അദ്ധ്യക്ഷത വഹിച്ചു. സഹകരണ ബാങ്ക് പ്രസിഡന്റുമാരായ എം. മിതീയന്‍പിള്ള, കെ.എസ്. കൊച്ചുപിള്ള, പി.കെ.സോമന്‍, പി.ബി. ഹാഷിം, ജോസഫ്.ജെ. മനയില്‍, പി.കെ.മുഹമ്മദ് സിദ്ധിഖ്, പഞ്ചായത്ത് വൈസ് പ്രസിഡന്റ് സൗജത്ത് ജലീല്‍, സ്ഥിരം അധ്യക്ഷരായ അഭിലാഷ് അശോകന്‍, കുഞ്ഞുമുഹമ്മദ് സെയ്താലി, കെ.എം.കൃഷി ഓഫീസര്‍ പി.എം. സാഹിദ ,പിങ്കി തോമസ്, എന്നിവര്‍ സംസാരിച്ചു.