തുറവൂര്‍: അന്ധകാരനഴിയില്‍ രാത്രി കാലങ്ങളില്‍ മണല്‍കടത്ത് വര്‍ധിക്കുന്നതായി പരാതി.
അഴിമുഖത്ത് അടിഞ്ഞുകൂടിയ മണല്‍ വന്‍തോതില്‍ വാഹനങ്ങളിലും ട്രോളികളിലും കയറ്റി കൊണ്ടു പോകുന്നത് ദിനംപ്രതി വര്‍ധിക്കുകയാണ്.
പകല്‍ സമയത്ത് എയ്ഡ് പോസ്റ്റില്‍ ഡ്യൂട്ടി പൊലിസുകാരുള്ളതിനാല്‍ മണല്‍ക്കടത്ത് നടത്താറില്ല.
രാത്രിയില്‍ പൊലിസ് പട്രോളിംഗ് ഇല്ലാത്തതാണ് മണല്‍കടത്ത് നടക്കുന്നതെന്ന് തീരദേശവാസികള്‍ പറയുന്നു.
രാത്രിയില്‍ പൊലീസ് എത്തുമെന്ന് മുന്‍കൂട്ടി അറിയുന്നതിനാല്‍ മണല്‍ക്കടത്തുകാര്‍ ഒളിച്ചിരിക്കുകയും പൊലിസ് വന്ന് പോയശേഷം വീണ്ടും മണല്‍ കടത്താന്‍ തുടങ്ങുമെന്ന് നാട്ടുകാര്‍ വ്യക്തമാക്കി.
രാത്രി പത്തിനുശേഷം തുടങ്ങുന്ന കടത്ത് പുലര്‍ച്ചെവരെ നടക്കുന്നുണ്ട്. ലക്ഷക്കണക്കിന് രൂപായുടെ മണലാണ് ദിനംപ്രതി ഇവിടെനിന്നും കടത്തുന്നതെന്ന് തീരദേശ വാസികള്‍ പറഞ്ഞു.