കൊല്ലം: നഗരത്തില്‍ പിന്നോട്ടു നടന്ന യുവസഞ്ചയം മുന്നോട്ടു നടന്നവര്‍ക്ക് കൗതുകക്കാഴ്ച്ചയായി. കാര്യമന്വേഷിച്ചവര്‍ക്കുമുന്നില്‍ നൂറു കണക്കിന് പ്ലക്കാര്‍ഡുകള്‍ തെളിഞ്ഞു. എല്ലാത്തിലും പ്രകൃതിയെ സംരക്ഷിക്കേണ്ടതിന്റെ അനിവാര്യത വിളിച്ചോതുന്ന മുദ്രാവാക്യങ്ങള്‍. കരിക്കോട് ടി.കെ.എം എന്‍ജിനീയറിങ് കോളജില്‍ മാര്‍ച്ച് 16 മുതല്‍ 19 വരെ നടത്തുന്ന ടെക്‌നോ മാനേജേരിയല്‍ കള്‍ച്ചറല്‍ ഫെസ്റ്റ് കോണ്‍ജുറ 2017 ന് മുന്നോടിയായി ഹരിതകേരളം പരിപാടിയുമായി സഹകരിച്ചാണ് പിന്‍നടത്തം(ബാക്കത്തോണ്‍) സംഘടിപ്പിച്ചത്.
2500ഓളം വിദ്യാര്‍ഥികള്‍ പങ്കെടുത്ത പരിപാടി ലോകത്തിലെ ഏറ്റവും വലിയ ബാക്കത്തോണാണെന്ന് സംഘാടകര്‍ അവകാശപ്പെട്ടു. ചിന്നക്കടയില്‍ സിറ്റി പൊലിസ് കമ്മിഷണര്‍ സതീഷ് ബിനോ ഫ്‌ളാഗ് ഓഫ് ചെയ്ത നടത്തം ബീച്ചില്‍ സമാപിച്ചു.